Hemsereko Pêroyî yê HDPyî Mîthat Sancaro ke namzedê Partîya Çep a Keske yê Riha yo Riha de rêxistinanê komelê sivîlî, keya û temsîlkaranê odayanê gureyan de qezaya Xelîlîye de ronişt. Namzedê bînî yê partîye zî tewrê kombîyayîşî bîyî. 

Hêverî namzed Ferît Şenyaşarî qisey kerd û pare kerd ke têkoşînê keyeyê Şenyaşarî 2 serrî yo verê Edlîyeya Riha de dewam keno. Şenyaşarî vat ke ê teyna seba keyeyê xo nê seba pêro keyeyanê ke raştê neheqîyan yenê xo têkoşîn kenê. Şenyaşarî vat: ''Ez key şora Meclîsî ez do biba vengê nê keyeyan.''

Dima Sancarî qisey kerd. Sancarî bale ante ser ke eke warê têkoşînî yê komelkî yew bibê azadîye do bêra û ê do xebatanê xo nê esasî ser o bikerê. Sancarî vat: ''Nê weçînayîşî îmkanê destpêkê neweyî yê. Seba rijnayîşê sîstemî nê weçînayîşî destpêkê vurîyayîşî yê. Nê weçînayîşan de ya dîktatorîye bêra awankerdene yan zî Tirkîya do demokratîk biba. Ma do bibê temsîlkarê çareserîya meseleya kurdan û haştîye.''

Sancarî vist vîrî ke asayîşê sindoqan wezîfeyanê tewr girîngan ra yew o û vat: ''Vera îqtîdarî têkoşîno tewr bitesîr yewîya ma ya. Rayîrê cuya haştîyane, têdûştîye û azadîya şaran pê demokrasî abeno. Ma do Riha pîya bikerê ca û warê têkoşîn û cuye. ''

Sancarî waşt ke rêxistinê komelê sivîlî, odayê gureyan û dezgehê bînî wa 14ê gulane de paştî bidê Partîya Çep a Keske.''