Endamê Heyetê Rayberdişî yê MAF-DADî avûkat Mahmut Şakarî derheqê tecrîdê girankerdeyî yê vera Rayberê Şarê Kurdî Abdullah Ocalanî de ANFyî rê qisey kerd.

 Şakarî da zanayene ke dima ke Rayberê Şarê Kurdî amebi esîrkerdene xebat û têkoşînê seba azadîya ey cade dîyayê destpêkerdene. Şakarî vat: ''1999 ra nata sere de Mehkemeya Heqanê Merdiman a Ewropa (MHME) rê dezgehanê cîya-cîyayan rê muracatî ameyî kerdene. Ma hertim sere de CPT pêro dezgehî derheqê rewşa Îmraliyî û Rayber Apoyî de agahdar kerdî û MHME, Konseya Ewropa, CPT ûsn de pêvînayîşî kerdî. Ma waşt ke Komîteya Heqanê Merdiman wa vera Tirkîya bira tedbîrî bigêra û Rayber Apo avûkatanê xo bivîno.''

Şakarî îfade kerd ke xîretanê înan netîceyî dayê û vat: ''2005 de mehkemeyêke bire daye ke muhakemekerdişê Rayber Apoyî edîl nêbîyo. Ancî 2014 de bire dîyaye ke şert û mercê Îmraliyî dûştê qedexeyê îşkenceyî yê. Axir Komîteya Heqanê Merdiman bira tedbîrî girewte. Huqûqê Tirkîya bi xo parçeyêkê tecrîdî yo. CPT zî bi xurtî peyê biranê xo de nêvindeno. Komîteyan Wezîran a Konseya Ewropa seba caardişê biranê MHME mesuldar a la vera Tirkîya teda nêkena. Meseleya esase zî xora tewirê nê dezgehan o. 25 serrî yo dezgehan û rêxistinanê huqûqî de pêvînayîşî yenê kerdene. Ewropa de xebatê vera tecrîdî dewam kenê.''

Şakarî bale ante ser ke Hemleya 'Abdullah Ocalanîr rê Azadîye, Meseleya Kurdan rê Çareserîya Sîyasîye' warê globalî de zaf girîng a û vat: ''Ganî huqûqnasê mîyanneteweyî seba na hemle hîsger bibê. Rewşa Birêz Ocalanî teyna seba meseleya kurdan ney seba pêro meseleyan zaf girîng a. Coka ganî sîyasetmedar, huqûqnas û akademîsyenî tewrê têkoşînê vera tecrîdî bibê. Têkoşînêk est o ke azadîya Abdullah Ocalanî keno esas.  Ganî têkooşîn bêmabên bêro domnayene. Şiknayîşê tecrîdî teyna seba kurdan ney seba pêro herême rojdemêko girîng o. Ez pê bawer kena ke bi têkoşînêkê mendeyî no tecrîd do bişikîyo.''