Wekîla DEM Partî ya Amedî Ceylane Akça derheqê pêvînayîşanê budçe û grevê vêşanîye yê tepişteyan de ANFyî rê qisey kerd.

Ceylane Akça da zanayene ke waştişê tepişteyanê grevê vêşanîye û çalakîkeranê Nobeta Edaletî waştişê DEM Partî yê û vat: ''Sey DEM Partî ma zî azadîya Birêz Abdullah Ocalanî wazenê. Heqê hêvîye ra heta wextê tepişîyayîşê Ocalanî rewş û tewirêko zelal werte de çin o. Seba ke çareserîya meseleya kurdan cade biresa komelî şert û mercî ganî bêrê afernayene. Seba ke ma haştî û têdûştîye pawenê ma nê waştişan anê ziwan. 

Birêz Ocalanî pawitişnameyanê xo de bale ante ser ke Mehkemeya Heqanê Merdiman a Ewropa (MHME) teyna pawitişo teknîkî qebul kerdo û Birêz Ocalanî vatbi 'Ganî MHME seba pawitişê sîyasîyî zemînêkî awan bikero. Sey meseleya kurdan, sey têkoşînê çekdarîyî, sey çareserîya şîdetî mîyanê sîyasîtî de. Seba afernayîşê nê şertan ganî vurnayîşêk bêro kerdene.' Na çarçewe de şert o ke azadîya Ocalanî bêra caardene ke dîyalogî bêrê kerdene.''

Akça pare kerd ke DEM Partî pêvînayîşanê budçe de şerh nayo pêroyînan ser û vat: ''Pêvînayîşan de seba fînansekerdişê şerî budçe virazîyena. Ma pêvînayîşan de zî vat ke faturayêka fînansî ya meseleya kurdan est a. Şerê vera kurdan Tirkîya feqîr keno. Budçeya ke dîyena Wezîrîya Karanê Zereyî, Pawitişê Mîlî, Wezîrîya Karanê Teberî û Serekkomarîye pîl a la buçeya Wezîrîya Perwerde û Weşîye ûsn. kêm a. Seba ke meseleya kurdan nêna çareserkerdene nê welatî de nêm mîlyon polîsî est ê. 

Na budçe tercîhanê dewlete mojnena. Bi na budçe teyna Vakur de ney Rojawan de û cayanê bînan de kurdî kişîyenê. Na  budçe budçeya îşxal, tecrîd û wayîrvejîyayîşê cergan a. Çaresernêkerdişê meseleya kurdan yeno manaya çaresernêkerdişê nê pêroyînan. Bi afernayîşê şert û mercan meseleya kurdan eşkena bi muzakereyan bêra çareserkerdene. Aktorê muzakereyan o verên zî Birêz Abdullah Ocalan o.''