Zîndanê Sîncanî de înfazê Nedîm Ozturkî (62) veradîyayîşê ci ra 10 rojî verî bi hawayêkê keyfî amebi vêşnayene. Nedîm Ozturk 120 rojî yo vera tecrîdî grevê vêşanîye de yo.

Waya ey Merale Halîsdemîr derheqê rewşa birayê xo de ANFyî rê qisey kerd.

Merale Halîsdemîr da zanayene ke Nedîm Ozturk Zîndanê Tekîrdagî de wexto ke newe amelîyatê fitiqî bibi raştê hêrişê gardîyanan ameyo û vat: ''Tekîrdag de gardîyanan îdîa kerd ke birayê mi hêrişê înan kerdo û 17 mengî ceza dîyayî ey. Birayê mi dima sewqê Zîndanê Burhanîye bi. Tîya de înfazê ci 17 mengan ame taloqkerdene. Nika birayê mi Zîndanê Sîncanî de binê tecrîdî de, hucreyê yewkesî de tepişîyeno. Dormeyê zîndanî zî girewte yo. Zîndanê Sîncanî seke yew bîr o.

10ê tebaxe de ez şîya zîyaretê birayê xo. Nika o 45 kîlo yo û rewşa ci xirab a. Ey vatêne nêeşkeno bivîno, bedenê ci lerzîyeno û mîza ci ra gonîye yena. Mi mudirê zîndanî de pê telefonî qisey kerd. Mi înan rê pers kerd ke çira vîtamê B1î nêdîyeno birayê mi. Midurî vat ke seba ke birayê mi nêwaşto înan nêdayo. La birayê mi pê waştişnameyê vîtamîn waştbi û îdareyê zîndanî zî ey rê vatbi ke Tirkîya de no vîtamîn çin o.''

Merale Halîsdemîr pare kerd ke seba Nedîm Ozturkî wext qedîyeno û waşt ke birayê ci wa mîyanê şertanê holêran de bitepişîyo. Merale Halîsdemîr vat: ''Zîndanê Sîncanî goreyê şertanê merdimatîye nîyo. Birayê mi teyna wazeno ke şertê ey bêrê holkerdene. Sûc o ke o zîndanêkê winayênî de tepişîyeno. Mi çend reyî muracatê Wezîrîya Edaletî û CÎMERî kerd la cewab nêdîya mi. Ez hînî nêeşkena vindera. Ez teyna wazena ke cade birayê mi vejîyo teber.''