Vera tecrîdê serê Rayberê Şarê Kurdî Abdullah Ocalanî û seba çareserîya meseleya kurdan  şaristananê Vakurê Kurdîstanî de 1ê sibate de Rayraşîyayîşê Azadîye yo Pîl do bêro kerdene. Rayraşîyayîşo ke serkêşîya DEM Partî, Kongreya Komelê Demokratîkî (HDK), Partîya Herêmanê Demokratîkan (DBP) û xeylêk rêxistinan de bêro kerdene, serrgêra Komployê Mîyanneteweyî de 15ê sibate de do biqedo.

Hemserekê MED TUHAD-FEDî yê Amedî Kerem Canpolatî bi rayîrê ajansê ma venga pêro kurdan da ke vera tecrîdê Îmraliyî 1ê sibate de tewrê Rayraşîyayîşê Azadîye yê Pîlî bibê.

Canpolatî dîyar kerd ke Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' dewam kena û çarçewa hemle de tepişteyê sîyasîyî 65 rojî yo grevê vêşanîye kenê. Canpolatî îfade kerd ke şarê kurdî tim vera tecrîdî payan ser de yo û vat: ''25 serrî yo tecrîdê Îmraliyî dewam keno û 3 serrî yo ke Abdullah Ocalanî ra qetî xeberêke nêna girewtene. Vera tecrîdî xeylêk xebatî yenê kerdene. 1ê sibate de zî Rayraşîyayîşê Azadîye yo Pîl do dest pêbikero. Rayraşîyayîş di hetan ra; Qers û Wanî ra do dest pêbikero û 15ê sibate de biqedo. 

Şexsê Abdullah Ocalanî de pêro kurdî binê tecrîdî de yê. Şarê ma her ca de tewrê xebatanê vera tecrîdî beno. La ganî no wayîrvejîyayîş pîlêr bibo. Teyna şarê kurdî ney ganî pêro şarê Tirkîya zî vera tecrîdî wurzê payan ser. Mefteyê çareserîye Îmrali de yo. Seba azadîya şaranê Kurdîstan û Tirkîya ganî tecrîd wedarîyo. Ez venga pêro şarê ma û kesanê demokratîkan dana ke wa tewrê Rayraşîyayîşê Azadîye yê Pîlî bibê.''