Îdarekaranê Federasyonê Komeleyanê Paştdayîşî û Huqûqî yê bi Keyeyanê Tepişteyan û Hukmwerdeyan (MED TUHAD-FED) Seda Zengîn derheqê grevê vêşanîye yê tepişteyan de ANFyî rê qisey kerd.

Seda Zengîn vist vîrî ke tepişteyî wazenê ka wa tecrîdê vera Rayberê Şarê Kurdî bêro wedaritene û vat: ''Ewro tecrîdê Îmraliyî vilayê her cayî bîyo. Zîndanan de heqê tepişteyan bi giranî yenê binpaykerdene. Bi tecrîdî kerdişê xirabîyî zî zêdîyayî. Tepişteyî wina bawer kenê ke bi wedaritişê tecrîdî tedaya vera nînan û vera komelî do biqeda. Eke îqtîdarê AKP-MHPyî qanûnanê welatî bîyaro ca mesele do biqeda. Rewşa tecrîdî bi giranî tesîrê komelî kena û ganî îqtîdar na babete de gamêke bierzo.''

Seda Zengîn da zanayene ke waştişê tepişteyanê grevê vêşanîye meşrû, heqdar û wijdanî yê û vat: ''Seba ke waştişê tepişteyan bêrê caardene ke grev biqedo mesuldarîyêka pîle kewena milê îqtîdarî. Îqtîdar keno ke bi teda peynîya çalakîya tepişteyan bîyaro la no rayîr şaş o.''

Seda Zengîn bale ante Nobeta Edaletî yê merdimanê tepişteyan ser û vat: ''Keyeyî hem seba ke paştî bidê tepişteyan hem zî seba ke waştişê înan vila bikerê Nobeta Edaletî kenê. Heta ke grevê vêşanîye dewam bikero Nobetê Edaletî zî do dewam bikerê. Waştişê keyeyan zî sey ê tepişteyan meşrû û heqdar ê.''