Namzetanê Partîya Çep a Keske ya Anqara ra Selma Gurkan ANFyî rê qisey kerd û venga pêro kesan da ke seba qedînayîşê rejîmê tekcamêrdî wa raya xo bidê Partîya Çep a Keske.

Selma Gurkan pare kerd ke goreyê netîceyanê nê weçînayîşan beno ke rejîmê tekcamêrdî bêro rijnayene û vat: ''Weçînayîşê 14ê gulane sey referandumî do bibê. Eke Erdogan newe ra nêro weçînayene hînî verê demokrasî bero akerdene û îmkanê têkoşînê vera xizanîye, bêkarîye û heqan bizêdîyê. Seba destvistişê heqanê xo û azadîye ganî ma hîna bi xurtî têkoşîn bikerê.''

Selma Gurkan da zanayene ke ê armanc kenê ke îmkananê xo hol bişuxilnê û nê îmkanan bivurnê destkewteyan. Gurkane vat: ''Ma wazenê bi hawayêkê xurtî ser bikewê û xeylêk wekîlan bişawê Meclîsî.  Ma venga kedkaran, bindestan, cinîyan û ciwanan danê ke wa raya xo bidê Partîya Çep a Keske. 14ê gulane de ma do peynîya nê rejîmî bîyarê. Ma ganî asayîşê sindoqan zî bîyarê ca. Ez venga şarê ma dana ke wa bibo muşahîd. Asayîşê sindoqan sey raydayîşî girîng o.''