Kampanyaya Sendîkayî ya Azadîye Seba Abdullah Ocalanî ke merkezê ci Îngîlîstan o , Bruksel de verê Parlamentoyê Ewropa de kombîyayîşêkê çapemenî yo lezabezî kerd.

Rayberdoxanê kampanya ya ke sendîkayê ke bi mîlyonan endamê ci est ê, tede ca genê, bale ante tecrîdê giranî yê 25 serran ê serê Rayberê Şarê Kurdî Abdullah Ocalanî ser û vat û di serran peyênan de ey qet xeberêke nêameya girewtene. 

Rayberdoxê kampanyayanê Vakur, Başûr û Rojawanê Kurdîstanî û îdarekarê KNK û KONGRA-GELî zî tewrê kombîyayîşî bîyî. Kombîyayîş de veng dîya CPTyî ke wa vera tecrîdî têbigêro. Qiseykerdişan bale ameye antene serê muhîmîya rolê Ocalanî ser û veng dîya dezgehanê eleqedaran ê Ewropa ke wa wezîfeyê xo bîyarî ca û seba ke tecrîd cade bêro wedaritene, şirê Tirkîya ser.

Eşkerayîye de wina ame vatene: ''CPTyî derheqê rewşa Îmraliyî de 30î ra zafêr raporî weşanayî. Nê raporan de tim ame vatene ke Tirkîya goreyê standartanê mîyanneteweyîyî tênêgêrena û venga Tirkîya dîya ke wa şetanê hepîsxaneyan hole bikero. La CPT gerek mîsyonê xo bîyaro ca û zafêr bikero. Tewr peynî de CPT êlula 2022yî de Îmali zîyaret kerd û adara 2023yî rapor eşkera kerd. Ma semedê nê raporî qesawet kenê. CPTyî îdîa kerd ke înan Birêz Abdullah Ocalan dîyo la Wezîrîya Edaletî ya Tirkîya vat Birêz Abdullah Ocalanî pêvînayîş red kerdo. Coka ma wazenê wa CPT detayanê zîyaretî pare bikero. Tecrîdê serê Birêz Ocalanî verê çareserkerdişê meseleya kurdan zî geno. Coka na rewşe tesîrê îstîkrar, asayîş û heqanê merdiman ê herême kena.''

Vengadayîş û Pêşnîyazî:

Hukmatê Tirkîya rê: 

Pênîyazanê Mehkemeya Heqanê Merdiman ê Ewopa û Komîteya Vergirewtişê Îşkenceyî  yê derheqê şertanê Zîdanê Îmraliyî cade bîyarê ca.

Konseya Ewropa rê:

Hukmatê Tirkîya ti pêşnîyazanê CPTyî red keno, seba ke nînan bîyaro ca muneqeşe bikerê.Seba ke hukmatê Tirkîya berpisîyarîya xo bîyaro ca gamenê ver bi ameyozî zelal bikerê.

Komîteya Vergirewtişê Îşkenceyî rê (CPT):  

Derheqê zîyaretê peyênî yê Îmraliyî de eşkerayîye bidê û vajê şima Abdullah Ocalan dir pêvînayîş kerd ya nê.Detayê nê pêvînayîşî zî tede zanayîşanê zelalan ê raştan bidê.

Heme aktoranê sîyasîyan ê herêmî û mîyanneteweyî  rê:

Seba ke Abdullah Ocalan semedê çareserkerdişê meseleya kurdan muzakereyan de rol bîgêro, xebatan rayra berê ke wa Ocalan serbest bêro veradayene.

Îmzakerdoxî:

Central Unitaria de Trabajadores (CUT), Cosatu, Cenfederacion Intersindical Galega (CIG), LAB, Steilas, Confederazione Unitaria di Base, CGT, Cobas, Confederacion Intersendical, Intersindical Alternativa de Catalunya (IAC), General Federation of Trade Unions (GFTU), Intersindical Valenciana, STUC, Euskal Sindikatua (ELA), CRED, CSI, SAT, Arci, Pour une Ecologie Populaire et Sociale (PEPS), TUC, France-Kurdistan, OSTA, 25deMarzo, Cobas Sardegna.