Komîsyonê Zîndanan ê Komeleya Huqûqnasan a Seba Azadîye (OHD) yê Îstanbulî raporê şeş mengan ê serra 2023yî yê Herêma Marmara eşkera kerd. Eşkerayîya ke banê komele de ameye kerdene hetê Zelale Akdogan ra ameye wendene.

Aydogane ard ziwan ke îqtîdarî serranê peyênan de vera heme muxalîfanê komelî zextî zêdînayî û vat: ''Sebebê nê tecrîdê Îmraliyî yo. 29 mengî yo Abdullah Ocalanî ra xebere nîna girewtene. Tecrîd çend şina heme zîndanan de vila beno.Zîndananê Herêma Marmara de vera tepişeyan tecrîd yeno caardene. Vera caardişanê tecrîdî dewletî ganî goreyê pêkerdişanê xo yê qedexekerdişê îşkenceyî têbigêrê ke wa vera îşkenceyê zîndanan de tedbîrî bêrê girewtene. Ganî dewlete bi hewayêkê aktîfî berpirsîyarîya xo bîyarê ca ke verê îşkence û binpaykeridşê heqan bêro grewtene.''

Akdogane ard ziwan ke tepişeyî waranê falîyetanê hemparan û weşananê ke dinyaya teberî ra tira xeberan genê, înan ra yenê mehrumverdayayene û vat: ''Îdareyê Zîndanî vera tepişteyan bi nê caardişan muameleyo teberê merdimîye mojneno. Vera kurdkî dişmenîye yena kerdene ke no goreyê huqûqê zereyî û teberî pîya qedexe yo. Astengkerdişê kurdkî binpaykerdişê heqan o û ganî cade nê binpaykeridişî biqedîyê.''

Akdogane bale ante rewşa tepişteyanê nêweşan ser û  nê vatî: ''Zîndanan de bi seyanê înan bi giranî, bi hezaran tepişteyê nêweşî est ê. Dewlete mecbura ke miqatê nê nêweşan bo û heme hewcedarîyanê înan bîyarê ca. Heqê tepişteyan est o ke xizmetê weşîye ra îstîfede bikerê.  Hetê bînî ra bi hewayêkê keyfî tepişteyî nînê tehlîyekerdene heqê veradayîşê bişertî ra nêeşkenê îstîfade bikerê. Bi qeraranê keyfîyan heqê tepişteyan ê sey azadîye û asayîşî û xeylêk heqê bînî yê bingeyênî yenê binpaykerdene.''

Hemserekê  MA TUHAYDERî Erogluyî zî vist vîrî ke derheqê binpaykerdişê heqanî de xeylêk muracatî komeleya înan rê ameyî kerdene û vat binpaykerdişê heqan ê zîndanan pabesteyê tecrîdê serê Abdullah Ocalanî  yê. Erogluyî veng da heme partîyanê sîyasîyan û rêxistinanê komelê sîvîlî ke wa semedê şiktişê tecrîdî têkoşîn bikerê.