Mexdûrê erdlerzî yê Semsûrî ke koçê metropolan yan zî dewan kerdî ANFyî rê qisey kerd û dîyar kerd ke heta nika hewcedarîya înan ê xeyman nêameya çareserkerdene û wazenê ke hewcedarîya înan a bingeyîne ya setargehî bêra safîkerdene.

Nedîm Dînç: ‘‘Ma pêro sefîlîye reyde rî bi rî mendî. Di rojî pêser varan vara. Eke varan nêvarayêne beno ke hende însanî nêmerdêne. Ma heme 3 rojî bi cilanê hîtan adirî ver o vinderte bîyî. Na şaşîya walîyî bîyî. Mi keye ra zap û çakûç ard şar binê xirban ra vet. Mi hîrê hebî meyîtî zî vetî. Di rojî kes xo nêresna Semsûrî. Erdlerzê dîyinî de bi temamî rijîya.

Mi gedeyî berdî Sêwrege de banêk kîra kerd û ez jî do şêra uca. Ma se bikerê? Her kesî koç kerd. Nêzdîyê 200 nas û merdim mi dinyaya xo bedilnaya. Semsûr serûbin bi.’’

Gûlê Aydin: ‘‘Ma zor xelisîyayî. Ma tersayî û nika kuçeyan ra yê. Ma xeyman de, adirî ver o yê. Çîyêk çin o. Hewcedarîya her kesan bi xeyme û werdî est a. Banê ma pêro rijîyayî.

‘Heta nika zî hema xeymî nêresayî’

Gaffûre Aydin: ‘‘Ma mexdûr ê. Ma raste ra mendî, mîyanê erebayan de rakewenê. Qaso ke destê înan ra yeno hetkarî kenê, sey werd, batanîye ûsn. la nê qîm nêkenê. Eke ban çin bo nêbeno. Ma bi gedeyanê xo kuçeyan ra yê û ma nêweş kewtê. Ma wazenê ke wa hewcedarîya ma ya setargehî bêra bi ca. Heta nika xeylê kesî merdî la qet nêbo êyê ke mendî, wa agêrê cuya xo ya verêne.’’

 ‘Dewlete qet xo nêresnena dewan’

Murat Bayir: ‘‘Dewan ra zî xeylê banî rijîyayî. Hewcedarîyê ma zî zaf ê. Tîya de her kes maxdûr o. Beno ke wezîfedarê dewlete şêrê merkezan la qet nêyenê dewan. Ma tîya ra peşîran bîyî. Destê ma de çîyêk nêmendo. Dewa ma de 28 kesî merdî. Seba ke merkezan ra her kes ameyo dewan. Dewe de ma 11 kesî xeymêke de manenê. 11 kesî xeymêke de nêbenê!’’