Komîteya Vergirewtişê Îşkenceyî (CPT) rixmo ke çend reyî Îmrali zîyaret kerd, raporê xo yê serê zîyaretan eşkera nêkerdî û vera tecrîdê Îmraliyî zî bêveng o. 

Serekê CPTyî yê verênî û avûkatê namdarî Marc Neveyî derheqê babete de Medya Haber TVyî de cewab da persanê Serkan Demîrelî.

Neve nika Serekîya Konseya Kontrolkerdişê Zîndanan a Belçîka keno. Neveyî wexto ke serekê CPTyî bibi hîrê reyî zîndanê Îmraliyî zîyaret kerdbi.

Qiseykerdişê Neveyî ra tay noqtayê girîngî wina yê:

''Zîyaretê min ê verênî de Ocalan Îmrali de yew hucre de tena bi. Temasê ey ê bi dinya çin bi. Zîndanê Îmraliyî verê cû baregehê leşkerî bîyo. Xora ma pê helîkopterî şîbî uca. Mi hîrê reyî Ocalan dî. Ey tim waştêne qisey bikero çunke binê tecrîdî de bi. Ocalanî mi rê vat ke ey tim milçîkanê penceraya hucreyî de qisey kerdêne. Zîyaretê ma seba ke Ocalan dinyaya teberî de têkilîye virazo yew firsend bi. Ocalan tim qerqilîyêne la seba xo ney seba şarê xo. Yanî qiseykerdişê ci şexsî nêbi. Ey zî zanayêne ke tepişteyêko sîyasî û taybet o. Ocalanî qala şertanê xo yê zîndanî nêkerdêne. Tim qala şarê kurdî û têgêrayîşê kurdan kerdêne. Nê tewirê ci zaf tesîrê mi kerd. 

Ma vatêne qey ma do bieşkê peynîya nê tecrîdê vera Ocalanî bîyarê û Ocalan neqlê zîndanêkê bînî bibo. La wina nêbi. CPT nêeşka zaf mudaxele bikero. Îmrali wayîrê şertanê yew zîndanî nîyo û hîna zaf seke merkezêkê tecrîdî yo. Coka ma waşt ke o neql bibo la dewleta tirke no qebul nêkerd. Mehkemeya Heqanê Merdiman a Ewropa (MHME) zî dûştê Zîndanê Îmraliyî birî girewtî. Raşt nîyo ke hende serrî yo Ocalan zîndan de û binê tecrîdî tepişîyeno. No tecrîd bi xo rûmetê merdiman binpay keno, îşkence beno. 

Derheqê tecrîdê Îmraliyî de rolê CPTyî hem zor o hem zî şert o. Şert o çunke ganî rewşa Ocalanî teberî ra bêra kontrolkerdene. La cayê qesawetî yo ke CPT raporanê xo yê serê Îmraliyî eşkera nêkeno. Na bêvengîya CPTyî tehluke ya. CPT pabesteyê Konseya Ewropa yo. Ancî Konseya Ewropa reyde Komîteya Wezîran, Meclîsê Wekîlan û MHME zî CPTyî ra mesuldar ê. Konseya Ewropa goreyê raporanê CPTyî têgêrena. CPt organêko sîyasî yo. Yanî erkê Konseya Ewropa est o ke karê CPTyî asan yan zî zor bikera.

Nika şertê Îmraliyî ancî zaf giran ê. CPT goreyê erkanê xo vera nê şertan têbigêro. Ganî CPT bikero ke Ocalan bieşko keye û avûkatanê xo bivîno. CPT eke biwazo eşkeno eşkerayîya rayaumûmîye bikero.

Ocalan seba çareserîya meseleya kurdan aktorêko girîng o. Seba azadîya ey ganî dewletê Ewropa zî têbigêrê. Seke mi verê cû zî vat raşt nîyo ke hende serrî yo Ocalan teşîyeno. Ganî rewşa Ocalanî bêra zelalkerdene. Tecrîd û teda rayîrê çareserîye nîyê. Çareserîye ganî bi dîyalogan bêra kerdene. ''