Pîsporê Tibê Edlîyî û Huqûqnaso swîsreyij Jean-Pierre Restellini ê ke sey endamê Komîteya Vergirewtişê Îşkenceyî yê Ewropa (CPT) serranê 1999, 2010 û 2013 Imrali de Rayberê Şarê Kurdî Abdullah Ocalan zîyaret kerd, derheqê zîyaretanê Îmraliyî û şertanê Abdullah Ocalanî de programê Rojdemê Ewropa yê Medya Haber TVyî de cewab da persanê Serkan Demirelî.

Roportajê  Jean-Pierre Restelli ra qismêk wina yo:

"Ez hîrê ray şîya zîyaretê Abdullah Ocalanî. Di pêvînayîşanê peyênan de mi mehkumê bînî yê ke cayê ey de yê,  ê zî dîyî. Pêvînayîşê verênî hema hema 25 serrî xo dima verdayî, coka vîrê mi biney leyl ê. Pêvînayîşanê ma yê bînan de Abdullah Ocalan goreyê pêvînayîşê verênî dahîna rehet bi. Mabênê ma de tekîlîya dostane ameye ronayene. Sey doktorêkî semedê weşîya Ocalanî qesawetê mi bibî. Mi o muayene kerd. 

Badê pêvînayîşê diyînî ma sey embazêkê holî mendî. Ocalan zaf sempatîk o. Pêvînayîşê ma 2013yî de seba ke ma yewbîn reyna dî ma şa bîyî. Seba ke zanayêne ez fransizkî zana mi rê vatêne  “My French Doctor” no vatişî de keyfê mi ameyênî. Nê pêvînayîşanê ma de muameleyo xirab nêesayêne. La şertê ewro, bitaybetî îzolasyon zaf zor o. Tecrîd şîdeto giran o.

Îmrali de hetê psîkolojîkî ra xoverdayîş zaf zor o. La Ocalan payra yo, çunke zano ke şarê ci peyê ey de yo. Raya verêne ke ma o dî, ma qerqilîyayêne, ma vatêne beno ke o xo bikişo. Pêvînayîşanê bînan de ma dî ke o bîyo hêzdar.

Heta ke welato selahîyetdar cevabê raporê CPTyî medo, CPT goreyê pêkerdişî nêeşkeno raporê xo eşkera bikero. Êyê ke cevabanê derheqê zîyaretê CPTyî eşkeanê nêkenê meqamê tirkan ê. Tirkîya mecbura ke cewabê CPTyî yê derheqê zîyaretê peyênî yê Îmraliyî biweşano.

Ocalanî ra tersenê. Zanê ke eke Ocalan azad bo zaf çîyan keno. Coka tersenê.Têna tirkî nê reyna welatê bînê ke kurdî tede yê ê zî tersenê. Vanê ke Ocalan azad bo kurdanê nê welatan resneno pê. Coka azadîya Ocalanî xo rê sey tehdîtî vînenî. Ez pê bawer a ke meselaya kurdan do bêro çareserkerdene. Fîkrê Ocalanî semedê şarê kurdî û çareserkerdişê meseleya kurdan zaf muhîm ê.

Şuxulnayîşê “terörist” her çîya ver xelet o. Her şer terorîzm nîyo. Eke çew semedê xelisnayîşê welatê xo şer bikero no teror nîyo. Qerarê PKKyî yê Amerîka rê ez eceb menda. No qerarêko sîyasî yo. Rewşa Ocalanî û Mendala secîye ya. Ganî eynî proses semedê Ocalanî bêro destpêkerdene.

Ganî çalakîye seba Abdullah Ocalanî bêrê domnayene. Tewr vernî de ganî Ocalan mero vîraşîyayene, bêro wayîrvejîyayene. Abdullah Ocalan babî, rayberê şarê kurdî yo. Eke yew babî û rayberê şima yo tepişte est o, ganî şima wayîrê ci bivejîyê. Ez Ocalanî reyde bîya samîmî, coka ez wazena helêke cuwa ver bêro veradayene. Ez hêvî kena ke ez demê kilmî de ey dewleta ci ya kurde de zîyaret bikerî. "