Serekwekîla Gruba DEM Partî Gulîstane Kiliç Koçyîgît pare kerd ke îqtîdarê AKP-MHPyî Qanûnê Bingeyî yê winayênî wazeno ke pê ci faşîzmî mende bikero û vat: ''Bêrê ma pîya vera na darbe xo ver bidê.''
Serekwekîla Gruba DEM Partî Gulîstane Kiliç Koçyîgît Meclîs de bi kombîyayîşê çapemenîye rojdem ercna.
Koçyîgîte hêverî hîrê sîyasetmedarî Sêvê Demîr, Fatma Uyar û Pakîze Nayir yad kerdî ke 8 serrî verî hetê dewleta tirke ra ameybî qetilkerdene.
Koçyîgîte bale ante ser ke Zanîngehê Koçî de wendekarêko elewî-kurd raştê hêrişê nîjadperestî ameyo la rixmê ney zî hêrişkerî ney wendekaro mexdûr zanîngehî ra ameyo dûrvistene. Koçyîgîte pare kerd ke ê do heta peynî na babete teqîn bikerê.
Koçyîgîte vera veranêdîyayîşê wekîlê TÎPî Can Atalay nêrazîbîyayîşê xo mojna û vat ke ganî birê Mehkemeya Qanûnê Bingeyî (MQB) cade bêrê caardene û Atalay vera bidîyo.
Koçyîgîte ard ziwan ke welat de îqtîdarê AKP-MHPyî darbeya mehkemeyan kerda û vat: ''No prosesê darbe 2015 de hêverî vera HDPyî dîyaye destpêkerdene. Dest nîya wekîlîya wekîlanê HDPyî ser. O çax seba ke nê kerdişê darbe vera kurdan û HDPyî ameyê kerdene çewî vengê xo nêkerd coka ewro dore ameya ê bînan. Ancî 2016 de hemserekê HDPyî zî tede xeylêk embazê ma yê sîyasetmedarî tepişîyayî, vera HDPyî dewaya qefilnayîşî û Dewaya Kobanê ameyî akerdene. Rejîmê AKP-MHPyî bi nê hawayî zemînê nê rojan awan kerd.
Îqtîdarê AKP-MHPyî tehdît û tedaya mehkemeyan, dezgehanê muhakemekerdişî û MQByî keno. Nika îqtîdar wazeno ke MQB bêtesîr bikero. Ganî ma vera nê çîyan bêveng nêmanê. Îqtîdarê AKP-MHPyî Qanûnê Bingeyî yê winayênî wazeno ke pê ci faşîzmî mende bikero. Qanûno Bingeyî yo newe yê AKP-MHPyî do ê Darbeya 12ê Êlule ra zî xirabêr bibo. Seba ke meseleya kurdan de çaresernêkerdiş de israr keno îqtîdar muracatê nê rayîran keno. Bêrê ma pîya vera na darbe xo ver bidê.''
