11 menganê peyênan de 134 rojnamegerê ke zafê înan kurd ê ameyî destbendkerdene û 33 rojnamegerî tepişîyayî. Rojnamegerê kurdî 2023 de rastê teda, destbendkerdiş û tepiştişî mendî.

Hemserekê Komeleya Dîcle Firatî Serdar Altanî û Endama Platformê Rojnamegeran ê Cinîyan ê Mezopotamya Dîrene Yurtsever serra 2023yî ANFyî rê ercnaye.

Dîrene Yutsever ard ziwan ke sey serranê bînan serra 2023yî de zî vera rojnamegeranê kurdan tedayî est bîyê û vat: ''2023 de atmosferê weçînayîşî est bi coka bi operasyonan xeylêk embazê ma tepişîyayî û vera nînan dewa ameye akerdene. La rojnamegerê kurdî ancî zî xeta çapemenîya azade de dewam kerd. Nê hetî ra 2023 qerardarîya rojnamegeran zî eşkera kerd. 

Tedayê vera rojnamegeranê cinîyan ê kurdan tedayanê vera rojnamegeranê bînan ra zaf ê. No zî polîtîkaya kolonyalîzmî ya îqtîdarî nîşan kena. La ma ancî zî 2023 bi xoverdayîşî temam kerd. 2024 seba ma do biba serra teda la serra cigêrayîşê raştîye zî. Verê ma de weçînayîşê herêmîyî est ê. 2024 de ma do têkoşînê hîna pîlî bikerê. MA do rêxistin û yewîya xo xurtêr bikerê.''

Serdar Altanî pare kerd ke 2023 de zafê ci kurdî 114 rojnamegerî ameyê destbendkerdene, 33 rojnamegerî ameyê tepiştene, vera 69 rojnamegeran tehqîqat ameyo akerdene û vera 58 rojnamegerî zî dewa ameye akerdene. Alkanî vat: ''Goreyê doneyanê ma nika zîndanan de 57 rojnamegerî est ê. Bêguman polîtîkayê tedayan ê vera çapemenîye 2024 de zî dewam bikerê. Îqtîdar do ancî xîret bikero ke çapemenî û rojnamegeranê kurdan bêveng bikero û asteng bikero.''