Sîyasetmedare Zeynepe Olbecîya ke çarçewa Dewaya Kobanê de tepişte ya, bi rayîrê avûkatanê xo mektubêke şawite û tede da zanayene ke a pa embazanê xo yê koxûşî çarçewa 'Hemleya Abdullah Ocalanî rê Azadîye, Meseleya Kurdan rê Çareserîya Sîyasîye' de tewrê grevê vêşanîye bîyê.

Zeynepe Olbecî mektuba xo de ard ziwan ke serra 2023î bîya serra şerî. Zeynepe Olbecî vat: ''2013 de ma dî ke bi muzakereyan şer senî vinderto û meseleya kurdan ser o bêçeke qalî yenê kerdene. La 2015 de seba menfaetanê sîyasî û ekonomîkan muzakereyî ameyî xerakerdene.

Ez zî tede tepişteyê sîyasîyî seba ke prosesê haştîye newe ra dest pêbikero, tecrîdê vera Birêz Ocalanî wedarîyo, pêvînayîşê bi Îmraliyî dest pêbikerê ma tewrê grevê vêşanîye bîyî. Ma venga rayaumûmîye danê ke foreyê nê waştişan têkoşînê cuya demokratîke û azade hîra bikera. 

Qirkerdişê vera cinî û domanan, tecawuzî, vêşanîye û pêrîşanîye ûsn. sebebê nînan xirabîya rêxistinkerde ya. Ma mecbur nîyê ke binê nê îradeyê xirabî de biciwîyê.

Seba ke tecrîd biqedı û muzakereyî dest pêbikerê ez û embazê mi ma kewtî grevê vêşanîye. Ez venga rayaumûmîya demokratîke dana ke seba caardişê heqanê ma yê meşrû û heqdaran bi hawayêkê xurtî têkoşîn bikerê.''