Dima ke demê destbendkerdişê HDPyîjanê ke operasyonê qirkerdişî yê sîyasîyî de ameyî girewtene, 4 rojî ame dergkerdene wekîlanê HDPyî verê Mudirîya Asayîşî ya Aqara de eşkerayîya çapemenî daye.

Wekîlê HDPyî yê Êlihî Necdet Îpekyuzî ke eşkerayîye de qisey kerd vat:  Ewro qerarêko bêhuqûq ame girewtene.  Embazê 4 rojî nêzanê ke qey nezaret de yê. Çapemenî de vera înan operasyonê îdraqî yeno rayraberdene. Embazê ma yê ke ameyî destbendkerdene vera înan huqûqê dişmenî yeno caardene. Îşkence vînenî û heqê înan yenê binpaykerdene. Avukatî şertanê zehmetan de înan vînenê. Werdê înan de problemî qewimîyene.

Îpekyuzî da pêhesnayene ke sîyasetmedarê ke nezaret de yê seba ke na rewşe protesto bikerê dest  pê boykotê ''nêgirewtişê  werdî' kerd û vat na rewşe nîna qebulkerdene, ganî muameleyê îfadeyî yê embazanê ma cade bêrê destpêkerdene.