Rîyê polîtîkaya şerî ya dewleta tirke krîzê ekonîmîkî çend şino xorî beno.  Hukmat her roje zemanê neweyan keno. Rojanê peyênan de  her çî rê têdima zem bi. Şaro ke mîyanê zeman de fatisyeno vera hukmat û dezgehanê ci dekerde yo. Şarê Sûrê Amedî derheqê tesîrê krîzê ekomîkî de ANFyî rê qisey kerd.

Yalçin Aras: Krîzî tesîrê pêro Tirkîya kerd. Her roje fîyatî bedilîyenî. Coka ma zî nêeşkenê îdareyê xo bikerê. Kesê ke bi ucretê tewr kêmî îdareyê xo kenê xora rewşa înan zafêr xirab a. Şar hinî sere wedarneno. Her roje zem beno. Ma hinî nêeşkenê nê şertan biciwîyê.

Zulkuf Şen: Ez bi xo personelê asayîşî ya û çar gedayê mi est ê. Ekonomî hinî merda. Ewro ra tepîya raşt nêbena. Çew nêeşkeno gedayanê xo weye bikero. Coka keye de hûzûr nêmendo.

Mecit Turgay: Şaro feqîr merdo hinî. Pastaya girde êyê ke Anqara de yê wenê.  Rewşa şarî perîşan a. Welatêko tede şer bibo, hetê ekonomî ra nêeşkeno bêro xo. Gerek verî şer û dizdîye bêrê qedînayene.  Pereyo ke şerî rê xerc beno wa citkarî, weşî û ekonomî rê bêro xerckerdene. Îqtîdar gerek herinda xo de semedê menfeatê şarî têbigêro.

Mustafa Demir: Ez nêeşkena bizewcîyî. Zerd zaf vay o. Ez nêeşkena keye bitepişî û biçînî tê, kîra û fîyatê eşya zaf vay o. Nê şertan ciwîyayîş bi xo însanî rê giran yeno.

Suleyman Dursun: Problemê ekomomîkî nêqedîyenê. Nê welatî de dizdîye est  a. Her kes dano yewbînan ro. Kedkarî pê meaşê 8 hezarî nêeşkenê îdareyê xo bikerî. No pere têna kîra û faturayan rê şino, werdî rê çîyêk nêmaneno.

Ali İhsan Okçu: Eke nê welatî de citkarî, heywankarîye merdî, wiriştiş hinî zaf zehmet o.  Reyna eke yew welatî de eke ti vera şarê xo şer kenî, xora zafê pereyî şerî rê şino. Gerek verî haştîye bêro welatî û dima ra paştî bidîyo citkarî û heywankarîye.

İsmail Ergen:  Ekonomî cum bîyo. Ciwanî ne eşkenê ameyoxê xo rone ne zî bizewcîyê. Dolar her roje şino dîyar. No zî serê pîyasa de tesîro xirab keno.  Her çî rê zem beno. Coka pêro xîyalê ciwanan rijîyayî.