Seba çeteyanê DAÎŞ’î yê ke destê YPG'yî de yê mehkemeya mîyanneteweyîye bêrê muhakemekerdene, hukmatê Swêdî kewt mîyanê têgêayîşî. Hollanda, Fransa, Îngilîstan û Belçîka bi hawayêkê germî nêzdîyê vengdayîşê Stockholmî benê.
Seba çeteyanê DAÎŞ’î yê ke hetê hêzanê YPG/QSD'yî ra weş ameyê girewtene mehkemeyêka taybet a bi beşdarbîyayîşê ewnîyaşîşanê mîyanneteweyîye bêrê muhakemekerdene, serkêşîya Stockholmî kewte mîyanê têgêrayîşî.
Goreyê zanayîşan, bi nê amancî bi cehdkerdişê Swêdî 3'ê Hezîrane de kombîyayîşo yewin ê mîyanneteweyî do bêro viraştene. Wezîrê Karanê Zereyî yê Swêdî Mîkael Dambergî ajansê xeberan ê Fransa (AFP) rê qisey kerd û ard ziwan, dewletî êdî ganî muhakemekerdişê bi nê hawayî bigêrê rojdemê xo.
Wezîr Dambergî vat, temsîlkarê welatanê ke do tewrê kombîyayîşê bibê teyna fikr û nîyadayîşanê xo parê nêkerê, eynî wext de seba ke DAÎŞ’ijî kamcîn sûcan ra bêrê muhakemekerdene zî nîşan bidê. Goreyê Wezîr Swêdî, heta nika Hollanda, Fransa, Îngilîstan û Belçîka cewabêko pozîtîf seba nê têgêrayîşî dayo.
Cayo ke tede yê uca do bêrê muhakemekerdene
Wezîr Dambergî da zanayene, DAÎŞ’ijî herinda berdişê bi Ewropa û Ewropa de muhakemekerdişî, cayo ke tede yê uca de mahkemekerdiş ci baştir o û vat,"Goreyê mi Rojakewtena Mîyanêne de awankerdişê mehkemeyan muhîm o, hem seba zêde zanayîşan arêdayîş hem zî seba ke zêdetir DAÎŞ'ijî bêrê muhakemekerdene.”
Awusturya zî seba çeteyanê DAÎŞ'î yê ke destê YPG'yî de yê mehkemeya sûcanê şerî yê mîyanneteweyî bêro muhakemekerdene kewtibi mîyanê têgêrayîşî. Wezîrê Karanê Zereyî yê Awusturya Kîcklî seba naye muracat bi Komîsyonê Yewîye yê Ewropa kerdibi. Yewîya Ewropa (YE) hîna cewab nêda nê waştişê Vîyana.
Serekê DYE Donald Trumpî menga Sibate de vengdayîş kerdibi û vatibi, "DYE Qralîyetê Yewbîyayeyî ra, Fransa, Elmanya û hemkaranê xo yê bînan ê Ewropa ra wazena, seba 800 zêdeyî şerwananê DAÎŞ'ijan ê ke Sûrîye de ameyê girewtene, seba ke mehkemeyan de bêrê muhakemekerdene, înan apey bigêrê. Alternatîfêko bîn çin o, nêbo ma mucbûr ê ke înan raverdê.”Labelê heta nika bi taybetî Almanya û Îngilîstan cewabêko nêgatîf da waştişê Trumpî.
2800 zêdeyî DAÎŞ'ijî hetê yewîyanê taybetan ê YPG'î ra vakurê Sûrîye de ameybî girewtene. Nînan ra 800 ra zêdeyêrê ci 46 welatanê cîyayîyan ra yê ke zafaneyê înan hemwelatijê rojawanî yê. Heta nika teyna Fransa, Endonezya, Rûsya, Fas û Sûdanî hemwelatijê xo yê ke hetê YPG’yî ra weş ameyê tepiştene, rayberîya Rojawanî ra waştê.
