Weçînitoxê Swîsre mabênê 29ê nîsane û 7ê gulane de seba weçînayîşanê Tirkîya do raya xo bidê. Koordînasyonê Weçînayîşî yê Partîya Çep a Keske Swîsre de bi eşkerayîyêke da zanayene ke amadekarîyê înan temam ê.

Swîsre de şaristananê Bern, Cenevre û Zurihî de 42 noqtayan de do sindoqî bêrê ronayene û 105 hezar û 821 weçînitoxî do raye bidê.

Partîya Çep a Keske do Basel, Solothurn, Luzern, Aarau, St. Gallen, Frebourg, Biel, Lozan û Winterthurî ra pê wesayîtan weçînitoxan bera cayanê sindoqan.

Baselo ke wayîrê hûmara weçînitoxan a zêde yo, tede Koordînasyonê Weçînayîşî yê Partîya Çep a Keske her roje standan akeno, vilawekan vila keno. Koordînasyon heta 29ê nîsane bi otobusan şarî do bero merkezê raydayîşî yê Zurihî.

Ewro çarçewa weçînayîşan de Basel de mîtîngêko pîl do bêro kerdene. Temsîlkarê HDPyî yê Ewropa Faysal Sariyildiz û Wekîla verêne ya HDPyî Besîme Konca zî do mîtîng de amade bibê.

Zerrîwazanê Partîya Çep a Keske ANFyî rê pare kerd ke hêzê înan est o ke faşîzmî birijnê. Zerrîwazan vat: ''Ma armanc kenê ke weçînitoxan berê sindoqan ser û bikerê ke şar raya xo bido Partîya Çep a Keske.''

Cenevre de zî zerrîwazî her roje keye bi keyeyî gêrenê û esnafan zîyaret kenê. Zerrîwazê Cenevre vilawekan vila kenê û seba Partîya Çep a Keske raye wazenê.