Îran de serrgêra serewedaritişê 'Jin, Jiyan, Azadî' rê tayêk mend. Hêzanê dewlete hûmara leşkeran û tedayê xo zêdînayî.

Welat de tepiştiş û hêrişanê vera aktîvîstanê cinîyan û muxalîfan dest pêkerd. Bi taybetî  keyeyanê şehîdanê serewedaritişî rê gef yeno werdene ke wa merasîman nêkerê û tay ferdê nê keyeyan tepişîyenê. 

Rixmê tedaya hêzanê dewleta Îranî xoverdayîşê cinîyan zî dewam keno. 

Ofîsê Beyrûdî yê Rêxistina Çimdarîya Heqanê Merdiman derheqê babete de eşkerayîyêke daye. Eşkerayîye de tedayê Îranî ameyî şermezarkerdene û venga komelê mîyanneteweyî ame dayene ke wa tedayê vera cinîyan û şarî tewir bimojno.

Cigêrayoxa Têkilîyanê Îranî ya Rêxistina Çimdarîya Heqanê Merdiman Tara Spêhrî Fer vist vîrî ke 16 aktîvîstê cinîyî 16ê tebaxe de Gîlan de ameyê tepiştene û vat: ''Dewleta Îranî pê nê tepiştişan kena ke verê protestoyanê girseyan bigêra. Selahîyetdarê îstîxbaratî û mehkemeyê Îranî vera qanûnan têgêrenê û aktîvîstan pê îdîayanê bêbingeyîyan sûcdar kenê.''

Tedayê Îranî Rojhelatê Kurdîstanî de zî dewam kenê. Mîyanê di hewteyan de nêzdîyê 30 aktîvîstî tepişîyayî, keye û aktîvîstan rê gefî ameyî wendene.