Wekîlê Partîya Çep a Keske yê Mêrdînî Kamuran Tanhanî derheqê tecrîdê Îmraliyî û tedayanê vera tepişteyanê sîyasîyan de ANFyî rê qisey kerd.

Tanhanî da zanayene ke Zîndanê Îmraliyî zîndanêkê îzoloasyon û tecrîdî yo û vat: ''Birêz Abdullah Ocalanî nêeşkeno keye û avûkatanê xo bivîno. Çew nêzaneno ke Îmrali de se beno. Şarê kurdî wazenı ke tecrîd bêro wedaritene û cade Birêz Ocalan bieşko keye û avûkatanê xo bivîno. Tecrîdê Îmraliyî reyde tedayê vera tepişteyanê sîyasîyan zî benê giranêr. Bi taybetî serranê peyênan de keyeyanê înan ser o tepişteyanê sîyasîyan rê polîtîkaya eciqnayîşî yena ferzkerdene. Tepişteyê nêweşî nêerşawîyenê tedawî, fîyatê kantînan zêde yê û teberî ra çîyêk nêno girewtene. Reyna bi hawayêkê keyfî cezaya qedexeyê têkilîye dîyena tepişteyanê sîyasîyan. Xora tepişteyê sîyasîyî hucreyê yewkesî de tepişîyenê û bi nê hawayî zereyê zîndanî de zî ceza dîyena înan.

Ma vînenê ke tepişteyê edlîyî bi qanûnê înfazî vera dîyenê. La tepişteyê sîyasî yê nêweşî terkê mergî benê. Dezgehê Tipê Edlîyî (ATK) bîyo dezgehê zulmî yê hukmatî. 31ê temmuze de qanûnê înfazî yo newe keweno dewre. La no qanûn tepişteyanê sîyasîyan nêgêno zereyê xo. A raşte bi sereyê xo no qanûn dişmenîya vera kurdan eşkera keno. Reyna no qanûn dûştê qanûnanê dewlete yo û halê têdûştî binpay keno.''

Tanhanî bale ante ser ke tepişteyê sîyasîyî rixmo ke înfazê înan qedîyayo hetê Heyetê Çimdarîye û Îdareyî yê Zîndanan ra vera nêdîyenê û karmendê nê heyetî goreyê karmendanê bînan meaşê zêdeyêrî gênê. Tanhanî vist vîrî ke înfazê tepişteyanê sîyasîyan bi bahaneyan yenê vêşnayene û no kerdiş zî dûştê qanûnan o.

Tanhanî vat: ''Tirkîya hînî welatêkê huqûqî nîya. Bi taybetî wextê peyênî de vera tepişteyanê sîyasîyan ê kurdan înfazî yenê vêşnayene û no kerdiş dûştê krîteranê huqûqî yo. Nê sîyasetmedaran cezaya xo temam kerde. Çew nêeşkeno newe ra nînan mehkum bikero. Înfazî bi cezayanê ke serranê 90an de dîyayê yenê vêşnayene.''