Tirkîya û Vakurê Kurdîstanî de krîzo ekonomîk her ke şino beno giranêr. Goreyê cigêrayîşê Sînorê Vêşanîye û Xizanîye yê Turk-Îşî tebaxa 2023yî de Tirkîya de sînorê vêşanîye yê keyeyêkî bîyo 12 hezar û 198 lîra û sînorê xizanîye zî bîyo 39 hezar û 733 lîra. Vera enflasyonê berzî û meaşê kêmî sere de Dîlok de xeylêk şaristananê Vakurê Kurdîstanî û Tirkîya de karkerî çalakîyan kenê.

Akademîsyen Ozgur Muftuogluyî kêmasîya zemê meaşan û vaybîyayîşê cuye ANFyî rê ercnayî.

Muftuogluyî ard ziwan ke mîyanê enflasyonî de hêzê hêrînayîşê merdiman kêmîyayo û vat: ''Nê çîyan xizanbîyayîş xo de ard. Tirkîya de hînî her çi vay o. Xizanîye karkeran qerqilnena coka karkerî neçare manenê ke mîyanê şertanê xiraban de bixebitê. Ewro meaşo asgarî bîyo nêmeyê meaşê karkeran. Karkerî binê asta xizanîye de yê. Coka nêrazîbîyayîşê înan xozayî yo. La Tirkîya de nêrazîbîyayîşê karkeran hempar nîyo. Xora sebebê ney ê sosyolojîkî est ê.''

Muftuogluyî dîyar kerd ke meseleya nikayêne teyna meseleya karkeranê Dîlokî yan zî ê Îstanbulî nîya û vat: ''Ma mîyanê krîzêkê cidîyî de yê û pêro sektoran binê tesîrê krîzî de yê. No krîz ancax bi çalakîyanê girseyîyan çareser beno. Ganî têkoşînê karkeran o herêmî bivurîyo çalakîyêka pêroyîye. Ganî karkerî û kedkarê umûmîye yew bibê.''