Serekwekîlê Grûba DEM Partî Sezaî Temellîyî Meclîs de kombîyayîşê çapemenîye kerd û rojdem ercna.

Qiseykerdişê Temellîyî ra tay noqtayê girîngî wina yê:

''Partîya ma ser ra 90 verweçînayîşê xo kerdî. Nê verweçînayîşê yewin ê ke Tirkîya de yenê kerdene û seba demokrasî zaf girîmg ê. Ma bi nê kerdişê xo sey şorişêkî gamêka avere eşte. Ez pê bawer a ke netîceya nê verweçînayîşan her kesî rê bixêr bê. Şarê ma nê verweçînayîşan de xora îradeyê xo mojna û vat de qeyûman bişawo. 

Anqara û partîyanê bînan no tabloyê demokrasî nêzdî ra teqîb kerd. Ma pê bawer kenê ke her kes nê tabloyî ra dersa hole bigêro. Ewro krîzê mehkemeyan dewam kenê. Mehkemeyêke nêeşkena Mehkemeya Qanûnê Bingeyîyî biqefilna. No erk teyna Meclîs de est o. Wezîrîya Edaletî biranê Mehkemeya Heqanê Merdiman a Ewropa (MHME) yê serê Demîrtaş û Kavalayî rexne kena. Wezîrê Edaletî vano ke birê MHME birê sîyasî yê. La Wezîrê Edaletî bi nê qiseyanê xo huqûq û edaletî binpay keno. Heyf ke ma hînî Tirkîya de nêeşkenê qala muhakemebîyayîşêkê edîlî bikerê.

Meseleyanê tewr girîngan ra yew zî meseleya ekonomî ya. Bankaya Merkeze û xezîne de yew bêcîdîyetîye est a. Ganî Bankaya Merkeze xoser biba. La ma vînenê ke Bankaya Merkeze bi hawayêkê sîyasîyî têgêrena. Budçeya 2023yî de yew xalîyêka qasê 700 mîlyar lîra est a.  Destpêkê serra 2024î de xalîya budçe bîya 2.7 trîlyonan. Wezîrê Ekonomî Mehmet Şîmşek vano ke ê do tesarufan bikerê. La na mesele bi tesarufan safî nêbena. Ganî Qesre tesarufan bikera. Ganî budçeya şerî de tesaruf bêro kerdene. Wa Wezîrîya Pawitişî tesarufan bikera. Heta ke şima meseleya kurdan bi rayîrê haştî û demokrasî çareser nêkerê û binê nameyê operasyonî de vera Rojawanî şer bikerê nêeşkenê tesaruf bikerê.''