FEDA û AABF yê ke Ewropa de xebitîyenê, înan venga pêro kurdîstanijan da ke wa paştî bidê Îtîfaqê Kede û Azadîye.

Serekê Federasyonê Demokratîkî yê Elewîyan (FEDA) Demîr Çelîkî ard ziwan ke weçînayîşê 14ê gulane seba bindest, xizan, kedkar û şaran zaf girîng ê û vat: ''Seba ke seserra komare demokratîk biba weçînayîşî firsend ê. Eke ma 14ê gulane  bi na stratejî pêşwazî bikerê û xo rêxistin bikerê do ser bikewê. Ganî Partîya Çep a Keske tewr tay 100-120 wekîlan bişawa Meclîsî ke Meclîs de bitesîr biba. Eke ma bieşkê ney ser bivisnê hînî do bieşkê faşîzmî zî birijnê, tecrîdî zî wedarnê û rayîrê demokrasî û têdûştîye zî abikerê.''

Vervatoxê Konfederasyonê Şaran ê Demokratîkî yê Ewropa Hasan Dêrsimî îfade kerd ke welat de zulm û zorbazîye est ê coka weçînayîşê 14ê gulane zaf girîng ê. Dêrsimî vat: ''Bêguman nê weçînayîşî her çî çareser nêkenê la tewr nêbo seba têkoşînê demokrasî gamî do bierzîyê. Eke şima raya xo bidê Partîya Çep a Keske vera faşîzmî û seba têkoşînê demokrasî gamêka pîle do bierzê.''

Serekê Herêma Baden Wurttembergî yê AABFyî Sedat Bîrcanî vat: ''Seba ke peynîya rejîmê tekcamêrdî bêra ardene ganî her kes bi mesuldarî têbigêro. Ma venga pêro weçînitoxan danê ke weçînayîşanê wekîlîye de raya xo bidê Partîya Çep a Keske.''