Wekîla DEM Partî ya Şirnexî Newroze Uysal Aslan derheqê rewşa zîndanan de ANFyî rê qisey kerd.

Newroze Uysal Aslan îfade kerd ke qanûnanê ceza de eşkera yo ke çita sûc o, kam çendek zîndan de bimano û vat: ''Zîndanî xora cayê winayênî yê ke tede polîtîkayêke yena dîyarkerdene. La tewirê tepişteyan, metodê xoverdayîşê vera rewle, tewirê înan ê vera na polîtîka ra dima polîtîkayêka newîye yena kerdene. Ma xoverdayîşê tepişteyan ra fam kenê ke zîndanan de şerêko senîn yeno kerdene. Kerdişê zîndanan vera huqûqî yê û îşkence yê. Bi nê kerdişan xîret yeno kerdene ke îradeyê tepişteyan bêro şiknayene û bi nê hawayî mesaj bêro dayene teberî zî. Dewlete zîndanan de polîtîkayanê taybetan ana ca. Vera têkoşeran zîndanan de polîtîkaya kiştişî yena ferzkerdene.''

Newroze Uysal Aslan dîyar kerd ke cezayê ke birîyenê zêde yê, şert û mercê înfazî giran ê û vat: ''Bi taybetî astengkerdişê tedawîya tepişteyanê nêweşan binpaykerdişê heqê ciwîyayîşî yo. Na polîtîkaya kiştişî ra tepişteyî nênê dermankerdene. Ma sey sîyasetmedaranê DEM Partî xîret kenê ke vera nê polîtîkayanê zîndanan bibê vengêk û xetêka têkoşînî dîyar bikerê. Na babete de seba veradayîşê tepişteyanê nêweşan ma do têkoşîn bikerê.''