Tepişteyê dewaya PKK û PAJKî 27ê teşrîna peyêne ra nata vera tecrîdê serê Rayberê Şarê Kurdî Abdullah Ocalanî û seba çareserîya meseleya kurdan grevê vêşanîye kenê.  Grevê vêşanîye yo bêdem-bidor  roja 11. de dewam keno. Semedê waştişê tepişteyan hema gamêke nêameye eştene û vera tepişteyanê ke çalakîye de yê, polîtîkayê zext û tehdîtî kewtî dewre.

Ame parekerdene ke îdareyê Zîndanê Ereglî bi qiseyê ''Ma do sîstemê Îmraliyî şima rê zî ferz bikerê, heta mergî şima do tîya de bimanê'' tepişteyê ke grevê vêşanîye de yê, tehdît kerdê.

Zîndanê Ereglî de tepişte Îsmaîl Çoban zî grevê vêşanîye de yo. Çobanî birayê xo Vacîp Çobanî rê qala tedayanê îdareyî kerde.

Vacîb Çobanî îfade kerd ke îdareyê zîndanî kekê ey û tepişteyanê bînan ê grevê vêşanîye tehdît keno û vat: ''Îdareyê zîndanî înan rê vato ke do înfazê înan bivêşno û zîndanî bikero sey Îmraliyî. Îdareyî tedaya psîkolojîke zî kerda û vato 'Şima do tîya de bimirê, vera nêdîyê.' ''

Hemserekê Komeleya Hetkarî û Paştdayîşê bi Keyeyanê Tepişteyan a Çukurova (Çukurova TUAY-DER) Ergîn Altuntaşî zî da zanayene ke Ereglî de heqê tepişteyan yenê binpaykerdene.

Altuntaşî vat: ''Cara tim tepişteyê sîyasîyî raştê kerdişanê xiraban ameyêne. La nê prosesê grevî de teda û zulmê vera nînan zêdîyayî. Tepişteyî yenê tehdîtkerdene. Tepişteyê grevî do bêrê berdene bi odaya sungerîne.''