Zîndanê Kiriklarî yê Îzmîrî de tepişteyî Sînan Durmaz, Onur Yilmaz, Abdullah Gunay, Sabah Dayan, Ozan Alpkaya, Halîs Daghan, Sertaç Kiliçarslan û Kenan Yildizbakan 59 rojî yo vera îşkence û kerdişanê xiraban grevê vêşanîye de yê.

Tepişteyan dabi zanayene ke nê kerdişî dima ke Haydar Alî Ak bi mudirê zîndanî ameyî kerdene. Wekîla HDPyî Serpîle Kemalbay û Endamê Komeleya Huqûqnasanê Seba Azadîye Alî Îhsan Beyî waştbi Akî reyde pêvînayîş bikerê la Akî no waştiş red kerdbi.

Tepişte Ozan Alpkayayî 23ê çeleyî de keyeyê xo reyde pê telefonî qisey kerd û pare kerd ke dima ke Kemalbaye û OHDyî îdareyê zîndanî de pêvînayîş kerd Haydar Alî Akî tepişteyanê grevê vêşanîye rê gefî wendî.

Alpkayayî vat: ''Hînî asayîşê ganê ma çin o. Beno ke vajê 'xo kişto' û cenazayê ma tîya ra vejîyê.'' Alpkayayî îfade kerd ke fek û bedenanê înan de birînî virazîyayî û venga rayaumûmîye da ke wa paştî bida înan.

Îdarekara Komeleya Paştdayîşî û Hetkarîya bi Keyeyanê Tepişteyan û Hukmwerdeyan a Ege (EGE TUHAYDER) Selma Arslan zî ard ziwan ke ganî her kes vera nê kerdişan cade têbigêro. altane vat: ''Ma nêwazenê zîndanî ra cenazayî vejîyê. No mudir ganî bêro vindarnayene.  Ak xo sey 'Ez dewamê Esat Oktayî ya, mi rê çîyêk nêbeno' pênase keno. Verî zî ey tepişteyan rê îşkence kerdo. O wexto ke Zîndanê Tekîrdagî de wezîfedar bi di tepişteyan dinyaya xo bedilnaya. Ma vanê qey selahîyetdarî nê kesî pawenê.''