Zîndanê Erzînganî de tepişteyê nêweşê kanserî Şakîr Turan (70) çar mengan de 23 kîloyî dayî. Turano ke bi îdîaya 'hetkarîya rêxistine' cezaya 6 serran girewtbî, rixmê nêweşîya xo vera nêdîya û Nêweşxaneyê Cigêrayîşî yê Erzînganî de dinyaya xo bedilnaye.

Turan rixmo ke hewteyêk o nêweşxane de bibi xebere nêdîyaye keyeyê ci. Lajê Turanî Abdurrahman Turanî da zanayene ke tepişteyanê bînan xebere daya keyeyî û 25ê tebaxe de o şîyo nêweşxane.

Abdurrahman Turanî pare kerd ke destûr nêdîyayo ke o babîyê xo bivîno û doktoran zî agahîyêke nêdaye ci. Turanî vat: ''Muracatê avûkatan ser o mi 28ê tebaxe de babîyê xo dî. Wexto ke newe kewtbî zîndanî o 75 kîlo bibi la wexto ke mi o dî babîyê mi 40 kîlo bi. O nêeşkayêne qisey bikero û pê zorî qisey kerdêne. Nêverdayêne ka ma hetê babîyê xo de bimanê. 

Babîyê mi bodrumê nêweşxaneyî de tepişîyayêne û 6-7 cendirmeyî serê ey de vindertêne. Mi waşt ez puncan bida ey ra la cendirmeyan nêverda. Babîyê mi yew bi yew ma ra xatir waşt û vat 'Miqatê xo bê, yew bê. Sereyê mi berz o, mi apey gamêke nêeşte.' ''

Cenazaya Turanî do qezaya Stewrî ya Mêrdînî de bêra definkerdene.

Şubeyê Amedî yê OHDyî 28ê temmuze de seba ke Turano nêweş vera nêdîyabî nêrazîbîyayîşê xo mojnabi.

Lajê Şakîr Turanî adara 2023yî de Wekîlê HDPyî Omer Faruk Gergerlîogluyî de pêvînayîş kerdbî. Gergerlîogluyî rewşa Turanî ser o pêşnîyazê persan dabi Wezîrîya Edaletî la vernîyaz nêamebi qebulkerdene.