Tepişteyo nêweş ê Zîndanê Osmanî Sabrî Kayayo ke qelbê ci se ra 25 xebitîyayêne 25ê adare de krîzê qelbî vîyarna û gonîye şîye mezgê ci. Kaya ame berdene bi Nêweşxaneyê Dewlete yê Osmanîye û 3 rojan ra nata beşê serwîsê  ciewnîyayîşê giranî  de yo. Kênaya ci Dîlan Kaya vat semedo ke îdareyê zîndanî dermanê Sabrî Kaya peyda nêkerd ey krîzê qelbî vîyarna û gonîye zî şîye mezgê ey.

Dîlan Kaya vat 26ê adare de doktorî aye rê vato ke krîzî zerar da pêro organanê babîyê ey, gonîye şîye mezgê ey ke damarê ey bîyî dê.  Dîlan Kaya îfade kerd ke babîyê ci Sabrî Kaya rê cezaya muebede amey dayene û serra 2010î ra nata tepişte yo. Sabrî Kaya di rey qelbê xo ra amelîyat bi, serra 2013î de rewşa weşîye ra îfazê ey qasê 3 mengan ame vindertene, pê raporê Dezgehê Tibî yê Edlîyî yê Îstanbulî yo ke vatêne ''Nêweşîya ey ê kronîke çin a'' reyna ame tepiştene. Dîlan Kaya vat: ''Ganî tepişteyê sey babîyê mi bêrê veradayene. Ganî weşkerdişê înan zîndanan de nê, keyeyê înan reyde bêro kerdene. Eke vera nêdîyê do zaf tepişteyî bimirê.