Zîndanê Antepî de tepişteyo nêweş Mehmet Huseyîn Ozo ke 'cezaya' ci qedîyaya, nêno veradayene. Ozo ke tede nêweşîya epîlepsî est a bi bahaneya 'mehqûl tênêgêreno', 'seba ameyoxê planê ci yê raştikênî çin ê' înfazê ey 3 mengan ame taloqkerdene.

17ê çeleyê 2019î de amebî tepiştene û cezaya zîndanî ya 6 serran û 3 mengan dîyabi ci. Ozo ke 34 serre yo, roje de 6-7 reyî nobeta epîlepsî yena ci û tede nêweşîya gurçikan zî est a.

Heyetê Çimdarîye û Îdareyî yê Zîndanî seba ke Ozî ferzkerdişê poşmanîye red kerd înfazê ci taloq kerd. Heyet 25ê tebaxe de reyna do veradayîşê Ozî biercno.