Îsmaîl Tanbogayo ke 2015 de qezaya Silopîya ya Şirnexî de xoverdayîşê xoîdarekerdişî de amebi tepiştene, ci rê cezaya muebede ya girankerde dîyabî. Tanboga  zîndan de pê kanserê nêweşî kewt la dima ame vatene ke tede ulser û gastrît est ê.

Nêweşîya Tanbogayî bi temamî nêameye teşhîskerdene. Tanboga teyna eşkeno werdê dergûşan biwero.

Dîya zanayene ke Tanboga 15 rojî verî seba ke rewşa bîya giranêre wedarîyayo Nêweşxaneyê Zanîngehê Dîcle. Ame parekerdene ke hewteyêkî ra dima xebera sewqê nêweşxaneyî dîyaya keyeyê ey.

Dadîya Tanbogayî Qumrîye Tanboga dîyar kerd ke destûr nêdîyeno ke a lajê xo bivîna û venga pêro kesan da ke derheqê babete de hîsger bibê.

Tanbogayo ke Zîndanê Amedî de tepişîyeno, lîsteya tepişteyanê nêweşan ê giranan a ÎHDyî de yo.