Platformê Kede û Demokrasîyî  bi wesîleya serrgêra 86ine ya Terteleyê Dêrsimî Yeserekê qezaya Qisle yo ke cayanê terteleyî ra yew o, aktîvîteya vîrardişî organîze kerde.

Temsîlkarê Partya Çep a Keske yê Dêrsim û qezayan, namzeda wekîlîye ya bajarî Aytene Kordu, hemsereko verên ê Baroyê Amedî Cîhan Aydin, pabesteyê Îtîfaqê Kede û Azadîye, Hemserekê Komeleyanê Elewîyan ê Demokratîkan  (DAD) Kadriye Dogan û Musa Kulu, temsîlkarê dezgehanê elewîyan, Pîr û Dedeyî tewrê aktîvîte bîyî.

Ver bi Dereyê Çiro ke xeylêk kesî tede ameyî qetilkerdene, rayraşîyayîş ame kerdene  û  kişta dereyî de çira û mûmî ameyî tafînayene. Dim ara şahîdanê dewrî  qala çîyanê ke ciwîyayî kerde. 
Şahîdanê terteleyî ra Turan Gulî vat: “71 dewijî ameyî girewtene, 6ê înan berdê dewa Kilî û heme mirnayî. Înan zaf hewar kerd. Hende qîrayî ke ame waştene ke wa qirkerdiş pê makînayan bêro kerdene. Goreyê vatişan Akdoganî rê telgraf ame antene û ame vatene ke ‘sigûyan caverdê, tifinganê makîneyînan bişuxulnê. ’ Domanê qişkekî zî mekteban ra girewtî û qetil kerdî. Kesê ke ameyî qetilkerdene mîyanê înan de yew gerguş/e zî seba ke nêeşka/ye nefes bîgêro/a, fatisya/ye.” 

Raîme Kizilkan zî vat: “Terteleyî de keyeyê mi ra 11 kesî ameyî qetilkerdene û zafê înan zî ameyî surgunkerdene. No zîhnîyeto qirker hema dewam keno. 38 zerrîya ma de yew birîn o.” 

Şahîdan ra Hidir Baran zî vat: “Keyeyê Aslanan, Kiliçan, Yildizan û Yildiriman arêdayî berde Dereyê Çirî de bi singûyan qetil kerdî. Cinîyêka binê meyîtan de weş mende, xelisîyaye, hîrê roj bi werdişê pelan ciwîyena. Şarê ma o wext zaf ezîyet dî.” 

Semedê yadkerdişê kesanê ke ameyî qetilkerdene, vilikî erzîyayî dere. Aktîvîteya yadkerdişî pê deyîranê hunermendê dêrsimijî Raber Dilerî qedîyaye.