Dewleta tirke tim hêrişê çalakîyanê komelkîyan kena û çalakîkeran rê îşkence kena. Tewr peyên ciwanî wexto ke Qirkerdişê Pirsûsî protesto kerdêne ameybî destbendkerdene û Mudirîya Asayîşî ya Vatanî de raştê îşkenceyî ameybî. Avûkata Yagmure Kavaka ke waştbi ke nê ciwanan de pêvînayîş bikera la amebî derbkerdene derheqê prosesê huqûqî yê vera îşkence û kerdişanê xiraban de ANFyî rê qisey kerd.

Yagmure Kavak da zanayene ke wextê îşkence û kerdişanê xiraban de ganî hemwelatîyî hêverî gerreyê sûcî bikerê, dima zî Mehkemeya Îdarî de dewa abikerê. Kavake pare kerd ke teorî wina ya la exlebî nê dewayan de birêke nêvejîyena. Coka hemwelatîyî dima muracatê Mehkemeya Heqanê Merdiman a Ewropa (MHME) û Mehkemeya Qanûnê Bingeyî (AYM) danê.

Avûkate Kavake vat: ''Îşkence û kerdişanê xiraban ra dima ganî cade û bi taybetî nêweşxaneyêkê dewlete de raporê weşîye bêro girewtene. Reyna ganî îşkence pê fotografan bêro belgekerdene û dima zî raporê Dezgehê Tipê Edlîyî (ATK) zaf girîng ê. Raporê ATKyî zî ganî îşkence ra dima cade bêrê girewtene. Hetê bînî ra zaf girîng o ke xebera îşkence û kerdişê xirabî bi rayîrê medya û çapemenîye bêra vilakerdene. 

Heyf ke nika seba dewlete îşkence zaf bîyo meşrû. Mîsal erdlerzê Hatayî ra dima polîsanê hêzanê taybetan ciwanêk derb kerdbi. Ma mudaxele kerd la polîsan ma rê vat ke 'Eke ma wina nêkerê islah nêbeno.' Rojawanê welatî de zî polîsî seba îşkenceyî vanê 'Ma erkê xo anê ca.' Coka teşhîrkerdişê îşkenceyî zaf girîng o.''