Vervatoxê YPGyî Nûrî Mehmûdî bi wesîleya peynîya serre ANFyî rê qisey kerd.

Mehmûdî  da zanayene ke Rojawan de bi Wisarê Şaran projeyêko newe ameyo pêşkêşkerdene û vat: ''YPG û YPJyî binê sîwana QSDyî de mesuldarîya caardişê nê projeyî girewte xo ser. Ma destpêk de pêro hêrişê dewleta tirke pûç kerdî. Ma dewtkewteyê pîlî zî vistî destî. Modelê Îdareyê Xoserî seba pêro şaran modelêko rind o. Mîyanê nê sîstemê îdarekerdişî de demokrasî est a. 2023 de ame dîyene ke tay dewletî sey dewlete tênêgêrenê ke dewleta tirke zî nînan ra yew a. Dewleta tirke sey dewletêka mafya têgêrena. 

Dewleta tirke rixmo ke hêrişanê xo de teknolojîya peyêne şuxilnena, nêeşkena verê hêzanê ma de ser bikewa. Wezîrê Karanê Teberî yê Tirkîya Hakan Fîdanî bi xo vat ke ê do binawanîya herême hedef bikerê yanî sûcê şerî bikerê. Ganî Yewîya Ewropa û NATO nê sûcanê dewleta tirke bivînê. Tirkîya de Komêka mafya dest nayo dewletêke ser. Tirkîya ganî xo nê rejîmê mafya û terorî ra bixelisna.''

Mehmûdî bale ante ser ke têkoşînê înan ê vera DAÎŞî dewam keno û vat: ''Bi hezaran cergê DAÎŞî zîndananê ma de tepişte yê û Kampa Holî de 50 hezar keyeyê endamanê DAÎŞî est ê. Ganî komelo mîyanneteweyî DAÎŞî ser o biranê neweyan bigêro. Kampa Holî de domanî bi mezgê DAÎŞî benê pîl. Hetê bînî ra herêmanê îşxalkerdeyan de dewleta tirke DAÎŞî weye kena.''

Nûrî Mehmûdî îfade kerd ke erkê înan o verên pawitişê destkewte û armancanê komelî yo û vat: ''Ma do erkê xo yê pawitişê destkewteyanê şorişî û komelî bikerê. Ma do vera pêro hêrişanê faşîst û nîjadperestan erkanê xo bîyarê ca. Wa şarê ma xem nêkero. Ma do serê rêçê şehîdan de ser bikewê. Ma DAÎŞ bin vist û ma do hêrişanê dewleta tirke zî pûç bikerê. Serkewtiş do ê ma bibo.''