Wekîlê HDPyî yê Êlihî û Hetkarê Hemserekanê Pêroyîyan ê HDPyî Mehmet Ruştu Tîryakîyo ke wextêk xebatanê weçînayîşan ê HDPyî ra zî berpirsîyar bibi, derheqê asayîşê weçînayîşan û qesawetanê komelî de ANFyî rê qisey kerd. 

Tîryakîyî  da zanayene ke teyna wextê raydayîşî de ney heta peynîya prosesê raydayîşî asayîşê weçînayîşan zaf girîng o û vat: ''Erdogano ke hem Serekkomar hem zî serekê AKPyî yo her roje mîtîngan de yo. La no pêro pê pereyê şarî beno. Partîya ma û partîyê bînî hetê fînansî ra wayîrê heman îmkanan nîyê. Fînanskerdişê sîyasetî de meseleya asayîşê weçînayîşî û şuxilnayîşê medya de zî meseleya asayîşê est a. Partîyê sîyasîyî nika kewenê weçînayîşan.

 Heyetanê sindoqan de temsîlkarê partîyan est ê. Seba ke ma sey Partîya Çep a Keske kewenê weçînayîşan nêeşkenê endamanê xo bişawê sindoqan ser çunke ma verê cû nêkewtbî weçînayîşan. Ma teyna eşkenê çimdarîyan erkdar bikerê. Xora bi hezaran embazê ma yê avûkatî sindoqan de erkdar bibê û ê do mudaxeleyê bêusûlîyan bikerê.''

Tîryakîyî pare kerd ke komel pê Heyetê Weçînayîşî yê Berzî (YSK) bawer nêkeno. Tîryakîyî ard ziwan ke înan weçînayîşan ra verî perwerde da erkdaranê sindoqan û vat: ''Embazê ke dibistanan de do wezîfe bikerê, nika perwerde vînenê. Her çiqas Serekê AKPyî Erdoganî bi ziwanê gefî weçînayîşî sey darbe pênase kerdê zî ma her kesî rê vanê ke îtîfaqê AKP-MHP-BBP-HUDA PAR do bin bikewo. Beno ke heta roja peyêne zî ê do provokasyon û hîleyanê xo rê dewam bikerê la şarê ma do pêro plananê înan pûç bikero.''