Karkerê kurdê ke Meydanê Teyarayan ê Trabzonî de xebitîyenê seba ke mabênê xo de bi kurdkî qisey kerdêne raştê hêrişê nîjadperestî ameyî. 

Vizêr serê sibayî mesayî ra verî wezîfedaranê asayîşî hêrişê karkeran kerd. Karkeran gerreyê hêrişkeran kerd.

Karkeran ra Bîlal Aktekînî vat: ''Wexto ke embazanê ma kafeterya de bi kurdkî qisey kerdêne wezîfedaranê asayîşî înan rê vat 'bi kurdkî qisey mekerê.' Seba ke embazanê ma vat 'her kes bi ziwanê xo yê dayîke qisey keno, ma zî bi ziwanê xo yê dayîke qisey kenê' nîqaş pîl bi. Qas 20 kesan hêrişê çar embazanê ma kerd. Wexto ke ma serebût eşnawit, ma zî şîyî kafeterya. Polîsan embazê ma berdî qereqolî. Embazanê ma raporê derbe girewte û gerreyê wezîfedaran kerd.

Çîyo ke ma aciz keno no yo ke her kes nê welatî de bi ziwanê xo eşkeno qisey bikero la ma nêeşkenê. Ma wazenê bi serbestî bi kurdkî qisey bikerê.''