Hêrişê îşxalî yê dewelta tirke yo  ke serkêşîya PDKyî de 17ê nîsana 2022yî de Başûrê Kurdîstanî de ame destpêkerdene, dewam keno. Bado ke 15ê tebaxe de mabênê Anqara û Bedadî 'pêkerdişê asayîşî' ame îmzakerdene hêrişî zêdîyayî. Goreyê doneyanê rêxistinanê heqanê merdiman sereyê na serre ra heta menga hezîrane ya 2024î artêşa tirke Başûrê Kurdîstanî de 833 reyî hêriş û bombardumanî kerdî. Rîyê hêrişanê îşxalî ra 500yî ra zafêr dewî ameyî vengkerdene û bi desan hemwelatîyî ameyî qetilkerdene.  Dewleta tirke tewr peynî de 23ê tebaxe de qezaya Seyîdsadiqî ya Silêmanî de rojnamegerî Gulîstane Tara û Hêro Bahadîn bi droneyê çekdarî qetil kerdî.

Hemsereka Kongreya Neteweyî ya Kurdîtanî  (KNK) Zeynebe Mûrad derheqê qewimîyayîşanê herême de ANFyî rê qisey kerd.

Zeynebe Mûrad bale ante hêrişanê vera herra Kurdîstanî ser û nê vatî: ''Dişmenê şarê me vera erjanê ma her qeyde hêrişan kenê. Şexsê Rayber Apoyî de Îmrali de tecrîd yeno rayraberdene, koyanê Kurdîstanî de hêrişî yenê kerdene. Kenê ke îradeyê şarê kurdî bişiknê. Vera ziwan, kultur û hunerê kurdan zî tehamul nêkenê.  Iran, Iraq û Sûrîye zî wina nêzdî benê la serkêşîya ci dewleta tirke kena. Dewleta tirke rixmo ke bi serran o çekan û teqaberanê NATOyî şuxulnena nêeşena ser bikewo. Kurdî kurdê verênî nîyî. Felsefe û paradîmaya kurdan est a. Xoverdayîşê Birêz Abdullah Ocalanî est o. Coka hinî çew nêeşkeno îradeyê kurdan bişikno.''

Zeynebe Mûrad ard ziwan ke şarê kurdî festîvala Frankfurtî de mesajêko xurt da û vat: ''Çar leteyanê Kurdîstanî ra bi hezaran kesî tewrê festîvale bîyî û pêro pîya azadîya Ocalanî û Kurdîstanî waşte. Dostê ma yê Ewropa zî zanê ke meseleya kurdan û problemê Rojhelatê Mîyanênî bi azadîya Birêz Ocalanî eşkenê bêrê çarserkerdene. Coka ê zî azadîya Birêz Ocalanî wazenê. Şarê ma bi nê waştişî waran de yo. Ganî partîyê sîyasîyî wezîfeyê xo bîyarî ca. Ma bi awankerdişê yewîya neteweyî eşkenê nê prosesî de ser bikewê. Wayîrvejîyayîşê herra Kurdîstanî têna wezîfeyê yew partî nîyo. Ganî her kes berpirsîyarîye bigêro xo ser. Ma veng danê partîyanê sîyasîyan. Esas berpirsîyar ê yê. Senî herra Kurdîstanî hetê leşkeranê tirkan ra yena îşxalkerdene û vera nê tewir nîno girewtene. No eybo pîl o.

Dewleta tirke bêvengîye ra paştî gena  û herra Kurdîstanî de kurdan qetil kena. Senî ke yeno zanayene rojanê ravîyarteyan de di cinîyê rojnamegerî Hêro Bahadîn û Gulîstane Tara hetê dewleta tirke ra ameyî qetilkerdene. Reyna Hewlêr de endamê KNKyî Deniz Cevdet Bulbun hetê MÎTî ra ame qetilkerdene. Ganî hinî çew vera nê hêrişan bêveng memano. Trajedîya pîl a ke qijê kurdan herra Kurdîstanî de yenê qetilkerdene. Şarê ma vera nê hêrişan vejîyeno la qîm nêkeno. Pê ruhê hemparî ma eşkenê nê hêrişan vindarnê. Berpirsîyarîya pîle ya hukmatê Herêma Kurdîstanî ya. Vera nê hêrişan tewirêko fermî nêgirewt. No seba înan şerm o. Dewleta tirke wazena ke heme destkeweyanê kurdan çîn bikero. No semedê Başûrê Kurdîstanî zî tehlukeyo zaf pîl o.''