Hemsereka Pêroyî ya DEM Partî Tulaye Hatîmogullari kombîyayîşê partîya xo de qisey kerd û rojdem ercna.

Tulaye Hatîmogullari bale ante şerê Zapî ser û vat: ''Wa baş bizanîyo ke tewr zaf dadîyê kurdî bi dadîyanê ke cenazayê ewladanê înan ê leşkeran yenê dejenê.''

Tulaye Hatîmogullari vera Serekê MHPyî Devlet Bahçelîyo ke DEM Partî kerda hedef nêrazîbîyayîşê xo mojna û vat: ''Parlamento de cayê ferasetêkê celadan çin o.''

Tulaye Hatîmogullari qiseykerdişê xo rê wina dewam kerd:

''Mergê leşkeran ra dima ancî bombardumanê vera Rojawanî dîyayî destpêkerdene. Rojawan dîyeno bombayan ver, sivîlî yenê qetilkerdene. Santralê ceyranî, depoyê genimî, nêweşxaneyî û warê sivîlan dîyenê bombayan ver. Wexto ke ma vanê Rojawanî têkoşînê şarê Rojawanî yê vera DAÎŞî yeno ma vîrî. Şarê Rojawanî pêrodinya vera belaya DAÎŞî pawitbî. 

Sey DEM Partî ma vanê ke rayîrê şima rayîr nîyo. Ma ancî rayîrê haştîye pêşkêşê komelî bikerê. Rayîrê ma rayîrê haştîye û dîyalogan o. Ma kenê ke projeyê çareserîye bikerê. Ma do qetî nê rayîrî ra anêgêrê. 

Birêz Abdullah Ocalanî hertim vatêne 'Firsendî bidê mi, ez do mîyanê hewteyêkî de na mesele çareser bikera.' La senî cewab dîya ci? Mutabeqatê Dolmabahçe ame betalkerdene, masaya dîyalogan ameye rijnayene, prosesê şerî û girankerdişê tecrîdî ameyî kerdene. Şer qetî çareserîyêke nîyo. Wa çew dejî hacetê sîyasetî nêkero. Hînî bes o. No erd gonîye ra mird bîyo. Ganî herinda kombîyayîşanê şerî de ma kombîyayîşanê haştîye bikerê.''