Wekîla HDPyî ya Adana Tulaye Hatîmogullari vera xeberanê derheqê vîrusê Korona de ke Hatay de medyaya komelkîye ser o vila bîyî, nêrazîbîyayîşê xo mojna. Tulaye Hatîmogullari ewro derheqê babete de eşkerayîyêka nuştekîye daye û Tulaye eşkera kerd ke xeberê sey ''Dewlete seba ke nufusê elewîyan kêm bikera kesê bivîrusî erşawitî qezayanê Defne, Samandagî û Arsuzî yê Hatayî. Wekîlê seba ke na xebere ser o munaqeşe bikerê Meclîs de kom bîyî. Nika zaf elewîyî pê vîrusê Korona kewtî.'' raşt nîyî.

Tulaye Hatîmogullari vat: ''Xeberê winasênî komelê elewîyan qerqilnenê. Hemwelatîyê gêrenê ma û persenê ke nê xeberî raşt ê yan ney. Sere de elewîyî ganî pêro şarê ma bizano ke hêrişê vera şaran senî beno wa bibo ma do pê aqil û hîsê hemparî vera ci têkoşîn bikerê. Pê xeberanê provakatîfan ê medyaya komelkîye bawer mekerê. Ganî kesê ke nê xeberî vila kerdî bêrê eşkerakerdene. Kesê ke komelê elewîyan qerqilnenê ganî bêrê hukmkerdene.''