Komîsyonê Karanê Weçînayîşî ra Berpirsîyar Hetkarê Hemserekanê Pêroyîyan ê HDPyî Emîralî Turkmenî derheqê prosesê peyê weçînayîşî de ANFyî rê qisey kerd.

Turkmenî qala prosesê kongre kerde û vat: ''Netîceyanê weçînayîşan ra dima Heyetê Îdareyî yê Merkezî birêke girewte. Hemserekanê ma zî pare kerd ke kongreya partîye do bêra kerdene û ê wezîfeyê xo ra fek vera bidê.  Ma bernameyê newera awanbîyayîşê partîye girewt xo ver. Her çî ra ver ma meclîsê xo yê partîye kom kerdî. Yanî ma meclîsê HDPyî û Partîya Çep a Keske kom kerdî û ercnayîşêkê weçînayîşî yo derg kerd. Bi komkerdişê hemserekanê wird partîyan ma prosesê weçînayîşî newe ra ercna. Reyna ma kombîyayîşê şarî zî ercnayî.

8 herêman de partîya ma şarî reyde ronişte, rexneyî arê dayî û ercnayî. Bi nê hawayî ma gama verêne eşte. Nika zî nîqaş û rexneyan ra dima ma prosesê newera awanbîyayîşî ard xo ver û ma amadekarîya ney kenê.''

Turkmenî ard ziwan ke HDP 27ê tebaxe de kongreya xo ya îstîsnayîye bikero û hînî mîyanê Partîya Çep a Keske de sîyaset bikero. Turkmenî vist vîrî ek Partîya Çep a Keske kongre de do nameyê xo bivurna. Turkmenî da zanayene ke nameyê partîye yo newe do tradîsyonê HDPyî bivisno vîrî.

Turkmenî vat: ''Weçînayîşê herêmîyî ma rê zaf girîng ê. Ma eşkenê şaredarîyanê xo newe ra bivisnê destî û narey ma do nêverdê ke şaredarîyanê ma rê qeyûm bêro tayînkerdene.''