Partîya Çep a Keske Yenîkapiyê Îstanbulî de mîtîngê fînalî kerd. Her nasname  û rengan ra bi des hezaran kesî tewrê mîtîngî bîyî. Mîtîng de Rayberê Şarê Kurdî Abdullah Ocalan ame silamkerdene û tecrîd ame şermezarkerdene.

Hemvervatoxa Partîya Çep a Keske Çîgdeme Kiliçaslan Uçar mîtîng de wina qisey kerd: “Siba roja ma ya serkewtişî ya. Ma do şirê sindoqan ser û raya xo bidê Çep a Keske. Ma do vera nê îtîfaqê xîleyan sindoqan bipawê. Kurdî do raya xo bidê têkoşînê xo, morê xo bidê binê dare ro. Ma do nê weçînitişî de do rejîmê yewmerdimî bişawê. Seba ke sîyasetê demokratîkî  biqedînê, sîyasetmedarê kurdan eştê zîndanan. Wa inkey bêrê meydanê Îstanbulî bivînê. Bi des hesaran hemrayê ma est ê ke têkoşînî rayra berê. No zî wa şima rê bibo derd. Emrê înan hendê morêkî mend. Siba pê her morî ê do bikewê rayîr, şorê.”

Badê qiseykerdişê Kiliçgun Uçar mîtîngo biheybet bi deyîranê Îlkay Akkaya qedîya. Badê mîtîngî dayîkêka nameyê ci nêame musayene, ameye destbendkerdene.