Vervatoxa Partîya Çep a Keske Çîgdeme Kiliçgun Uçar  derheqê weçînitişanê 14 gulane de ANFyî rê qisey kerd.

Uçare vat: “Îqtîdarê AKP-MHPyî bi nameyê bînî rejîmê yew merdimi xeylêk wexto xo sey wayîrê Tirkîya hesibneno. Keno ke Tirkîyaya AKPyî afirno la vera rejîmê yew merdimi têkoşîno xurt est o. Coka no weçînitiş do mabênê şaran û îqtîdarî de bêro kerdene. Şar eşkeno nê weçînitişî de qederê xo bibedilno. Serkewtişê HDPyî yê weçînitişanê 7ê hezîrana 2015î  serkewtişo tewr pîl yê vera rejîmê yew merdimî yo. Ma weçînitişê 1ê kanûne de zî rixmê heme zextan reyna serkewtî. 

O wext sere de  CHP seba ke muxalefetê demokratîkî rolo gird ê HDPyî yê vera rejîmê yew merdimî nêdî, ewro welat mîyanê na tengayîye de yo. CHPyo ke o wext wayîrê dînamîkanê demokratîkan nêvîya, ewro  semedê bedilnayîşê rejîmê yew merdimi gamanê bineyna pêtan erzeno. Waştişê ma hempar o.”

Çîgdeme Kiliçgun Uçar  bale ante operasyonê qirkerdişê sîyasîyî yê peyênî ser û vat: “Îqtîdarê AKPyî prosesê vîjnayîşî sey prosesê şerî rayra beno. Vera nê zî muxalefeto komelkî têkoşînê girdî rayra beno. Îqtîdarî heme mekanîzmayê şîdetî vistî dewre la destê komelî de zî tecrubeyê 20 serran, têkoşîno gird û hêzê newe ra înşakerdişî est o. Vera şîdetê îqtîdarî têkoşînê şaran est o.

 Îtîfaqê Kede û Azadîye xora îtîfaqê têkoşînî yo. Ma waşt weçînitiş de zî nê îtîfaqî rayra berê. Ma waşt TÎP zî sey leteyê nê îtîfaqî lîsteya Partîya Çep a Keske ra bikewo weçînitişî la înan qerar girewt ke bi lîsteya xo bikewê de. Eke ma têna bi lîsteya Partîya Çep a Keske bikewtêne de ma dahîna gird serkewtêne. Na merhele me ma yo TÎP rakîbê yewbînan ê. Ma partîya xo rê reye wazenê ey xo rê. Nê hema ma nêardî vera yewbînan la têna bi lîsteya Partîya Çep a Keske dekewtiş muhîm bi.”

Uçare derheqê xebaranê spekulatîfan ê vera partîya ci zî nê vatî: “Vera namzedan û xebatkaranê partîya ma bi deste AKPyî operasyonê destbendkerdişî yenê kerdene. Bîlasebeb embazanê ma krîmînalîze kenê ke prosesê weçînitişî ra bifînê dûrî. Seba ke serkewtişê ma yê weçinitişî vînenê, kenê ke verê ci bîgêrê. La xora şarê ma mûsayeyê nê zextan o. Ê se kenê wa bikerê nêeşkenê verê ma bîgêrê. Vera şîdetê înan têkoşînê ma dewam keno. Partîya Çep a Keske wayîrê mîrasê girdî yê têkoşînî ya û pîya bi îtîfaqanê xo gamane pêtan erzena.  Verê serkewtişê ma de qet astengîyêk çîn o.”