Vedat Aydin gorê xo de ame yadkerdene
Serekê HEPî yê Amedî Vedat Aydin bi wesîleya Roşanê Qurbanî gorê xo de ame yadkerdene.
Serekê HEPî yê Amedî Vedat Aydin bi wesîleya Roşanê Qurbanî gorê xo de ame yadkerdene.
HDP, Partîya Herêman ê Demokratîkan û Komeleya Paştdayîş û MEBYA-DERî bi wesîleya Roşanê Qurbanî gorê Serekê Partîya Kede ya Şaran ê Amedî Vedat Aydin zîyaret kerd. Vedat Aydin 5ê temmuza 1992î de amebi qetilkerdene. Hemsereka Pêroyî ya DBPyî Salîha Aydenîz, Wekîlê HDPyî Dersim Dag, Hişyar Ozsoy û Nusrettîn Maçîn, Hemserekê HDPyî yê Amedî Zeyat Ceylan û Hulya Alokmen, birayê Vedat Aydinî Veysî Aydin, temsîlkarê Rêxistinanê komelê sivîlî beşdarê zîyaretî bîyî.
Hemserekê HDPyî yê Amedî Zeyat Ceylanî gorê Vedat Aydinî de qisey kerd û vat: ''Vera şarê kurdî zaf hêrişî ameyî kerdene la ê tewr ser nêkewtî û do nêkewê. Ma do hêvîyanê seba haştîye û azadîye vîn nêkerê. ''
Birayê Vedat Aydinî Veysî Aydinî vat: ''Ma hînî wazenê ke roşan bibo wesîleya vindertişê gonîye. Ma haştîye wazenê.''
Hemsereka DBPyî Salîha Aydenîz zî Roşanê Qurbanî yê şaran fîraz kerd û vat: ''Têkoşînê azadî û haştîye yê îdealanê Vedat Aydin û embazanê ci seba ma mîrasêk o. Îqtîdar çend hêriş bikero zî ma do vera faşîzmî sereyê xo nêarê war.''
Wekîlê HDPyî yê Riha Nusrettîn Maçînî zî vat: ''Aydin bi hawayêkê nimitkeyî ame qetilkerdene la aslê xo de faîl yeno şinasnayene. Înanê ke têkoşînê Aydinî ra tersayêne o qetil kerd. Ma do têkoşînê ey dewam bikerê.''
Qiseykerdişan ra dima serê gorê Vedat Aydînî de qerenfîlî ameyî verdayene.