Paytexta Îngîlîstanî London de nêrazîbîyayîşê vera hêrişê polîsan ê vera Merkezê Komelê Demokratîkî yê Kurdan dewam dewam kenê. Îdarekarê komelê vera hêrişan dewa akenê. Hetê bînî ra bi çalakîyêke hêrişî ameyî protestokerdene.

London de şewa 26ê teşrîna peyêne de semedê pîrozkerdişê Roşanê Ganîbîyayîşî Merkezê Komelê Demokratîkî yê Kurdan de şayîye ameybî organîzekerdene. Verê na şayîye polîsan û tîmanê atnî-terorî yê ke pabesteyê Wezîrîye Karanê Zereyî  eşt komele ser. Vera polîsanê  îngîlîstanî yê ke bêdestur kewtî mulkê taybetî yê kurdan têkoşîno xurt ame dayene. Netîceya naye de 3 aktîvîstê kurdî biyî birîndar û polîsî mecbur mendê ke peyser agêrê.

Avûkatê komele do derheqê hêrişê polîsan de dewa akerê. Avûkatan waşt verî wa Polîsê Metropolîtanî derheqê serşetişî de eşkerayîye bidê û vajê qey vera aktîvîstanê kurdan nê zextî yenê kerdene. Polîsan cewabê avûkatan nêda. Qeraqolê Polîsan ê herêma Haringeyî ke banê komele tede yo  vat operasyon û sereştiş teberê ci de ameyo kerdene. Ame vatene ke sereştiş û operasyon hetê tîmanê antî-terorî yê Fermandarîya Merkezê Polîsan ê Metropolîtanî ra ame kerdene.

Îdarekara komele Turkane Budak vat ê do hinî vera polîtîkayanê hêrişkaran ê dewleta îngîlîstane yê vera kurdan bêveng memanê û heqanê xo yê fermî û demokratîkan bişuxulnê.  Budake vat, ''Krîmînalîzekerdişê kurdan û dezgehanê înan nîno qebulkerdene.  No çîyo bêehlaq o. Hinî sebrê kurdan nêmendo. Seba ke sempatîya şarê îngîlîzî kurdan û Rayberê Şarê Kurdî Abdullah Ocalanî rê est a, wina hêrişan kenê. Seba ke bi Tirkîya pêkerdişê înan ê taybet û menfeatê înan o  ekonomîk est o, wazenê kurdan qurban bikerê. Ma do çirey desturê nê medê.''

Hetê bînî ra Yewîya Hêzê Demokratîkî yo ke tede komelê kurd, elewî, şorişgêr, sosyalîstan ca genê bi çalakîyêke hêrişî protesto kerdî. Grûbanê enternasyonalîstan, Partîya Karkeranê Sosyalîstan û endamanê têgêrayîşê Kurdîstanî ra  bi seyan kesî Meydanê Wood Greenî de ameyî têhet û ver bi komela kurdan rayra şîyî. Çalakîye de polîtîkayê krîmînalîzekerdişê kurdan ameyî şermezakerdene.