Konferansê Neteweyî yê vera Îşxalî netîcenameyê konferansê xo weşana. Netîcename de ame vatene ke hêzê serdestî bi taybetî dewleta tirke ya îşxalkere hêrişanê vera Kurdîstanî rê dewam kenê û îşxalê Efrîn, Girê Sipî û Serêkanîyê ameyî vîrvistene. 

Netîcenameyî pare kerd ke dewleta tirke bêmabên hêrişê Mexmûr û Şingalî kena û 24ê nîsana 2021î ra nata zî vera Başûrî hêrişanê îşxalî kena. 

Netîcename wina dewam keno: ''Heqê cinîyan ê kurdan yenê binpaykerdene. Bi taybetî Efrîn de her roje cinîyî yenê remnayene, maruzê tacîz û tecawuzî manenê û kişîyenê. Demografîya Kurdîstanî vurîyena, kurdî erdê pîr û kalikanê xo ra yenê vetene. Têgêrayîşê Azadîye yê Kurdîstanî hema zî hetê tay dewletan ra sey terorîstî yeno pênasekerdene. Naye ser o xeylêk selahîyetdar, cinîyî û kesayetê kurdî pê terorîzmî yenê sûcdarkerdene.

Vera nê kerdişan hema zî qet yew dewlete û dezgehê mîyanneteweyî tewirê xo nêmojna. Ma bêvengîya înan şermezar kenê. Kurdê ke DAÎŞ qedîna paştdayîş heq kenê. 

Konferansê ma reyna eşkera keno ke erdê Kurdîstanî ê pêro kurdîstanijan o. Na raştîye meşrû kena ke her hêzê neteweyî Kurdîstan de bimano û xebatanê xo rê dewam bikero. 

Netîceyê konferansê ma wina yê:

-Ganî pêro hêzê Kurdîstanî bi yewvengî vera îşxalî vinderê, bêtewir nêmanê û nêbê hemkarê hêrişan.

-Ma venga partî, dezgeh û rêxistinanê Kurdîstanîyan danê ke semedê xurtkerdişê yewîye û vergirewtişê tehlukeyan cade heyetêkê berzî  amade bikerê û dest pê karî bikerê.

-Roşnvîr û kesayetê Kurdîstanî ganî bi xurtî vera îşxalî tewirê xo bimojnê, îşxalî vindarnê û hêzanê Kurdîstanîyan pêro hîşyar bikerê.

-Dewleta tirke bêvengîya hêz û dezgehanê mîyanneteweyîyan ra cesaret gêna û çekanê kîmyewîyan xebitnena. Ma venga pêro hêz û dezgehanê mîyanneteweyîyan danê ke vera nê sûcî bêveng nêmanê û paştî bidê şaranê Kurdîstanî.

-Konferans de Komîteya Îrtîbatî, Komîteya Lobî û Dîplomasî ronîyayî ke xebatê vera îşxalî bêrê caardene.

Ma venga pêro terefan danê ke wa bi hawayêkê xurtî paştî bidê 'Platformê Vera Îşxalî' û vera xebatanê komîteyan akerê.

Ma sey beşdaranê 'Konferansê Neteweyî yê vera Îşxalî' venga rayaumûmîya Kurdîstanî û dinya danê ke wa erkê xo yê merdimîye bîyarê ca û verê hêrişanê barbaran ê dewleta tirke bigêrê.''