Ewropa de Platformê Neteweyî yê Vera Îşxalî bi 'Konferansê Neteweyî yê Vera Îşxalî' kerd. Konferans de semedê yewîye û vera îşxalî mesajê têkoşînî ameyî dayene.

Temsîlkara Têgêrayîşê Cinîyan ê Kurdan ê Ewropa (TJK-E) Besîme Konca bale ante konferansanê winasênan ser û vat: ''Ma tim qisey kenê la tênêgêrenê. Ganî ma hînî qiseykerdişî war verdê û gaman bierzê. Îşxalkerî hê erdê ma ser o bombayan varnenê û domananê ma kişenê.''

Wekîlê verênî yê HDPyî Osman Baydemîrî ard ziwan ke çar parçeyanê Kurdîstanî de têkoşîn esto û vat: ''Ganî ma pêro partî û îdeolojîyan debikerê binê xizmetê Kurdîstanî. Ganî ma mabênê partîyan de bibê pirdêk û yewîya awan bikerê.''

Wekîlê verênî yê YNKyî Muhsîn Osmanî vat: ''Ganî ma ruh û mezgê xo de vera îşxalî wurzê payan ser.Seke Ehmedê Xanîyî vat 'Eke ma nêbê yew, ma do vila bibê.' Ma do xeyalê ey bîyarê ca.''

Hemserekê KCDK-E Yuksel Koçî vat: ''Semedê yewîye ma ganî giranîye bidê dîplomasî û vera îşxalkeran tewirêkê zelalî bimojnê.''

Temsîlkarê Asûrî û Sûryanan George Aryoyî vat: ''Îşxalê Tirkîya vera sûryanan o zî. Ganî ma vera îşxalî bibê yew.''

Konferans de yewîya kurdan, geşkerdişê dîyaloganê mabênê partîyanê kurdan û hîrakerdişê platformê neteweyî ameyî nîqaşkerdene. Konferans de komîteyê dîplomasî, têkilîyanê mabênê kurdan û partîyan, çapemenîye ameyî ronayene.

Wina pawîyeno ke birê konferansî roja dişemeyî do bêrê eşkerakerdene.