Amed saetanê serê sibayî de polîsanê tirkan eşt Komeleya Cigêrayîşê Ziwan û  Kulturî yê Mezopotamya (MED-DER,  Pirtûkxaneyê Payîzî û  Kooperatîfê Ziwan û Hunerî yê Anka ser. Xeylêk kîtab, rojname, kovar û meteryalê dîjîtalî ameyî destsernayene û 25  kesî ameyî destbendkerdene. Platformê Kede û Demokrasîyî yê Amedî sereştişê polîsan Meydanê Şêx Seîdî de bi eşkerayîyêke protesto kerd.

Pîya bi temsîlkaranê partîyanê sîvîlan û rêxistinanê kolemê sîvîlî yê bajarî, Wekîlê DEM Partî yê Amedî Serhat Eren û  xeylêk kesî tewrê eşkerayîye bîyî. Çalakîye de pankartê  ''Ziwanê ma estbîyayîşê ma yo''  ame akerdene  û sloganê sey “Be Kurdî jiyan nabe”, “Be ziwan jiyan nabe” ameyî vatene.

Eşkerayîye de nê ameyî vatene: ''Îqtîdar vera ziwan û kulturê kurdan polîtîkaya qirkerdişî rayra beno. Ziwan û kulturê kurdan bi zengînîya xo vera nê polîtîkayanê asîmîlasyonî têkoşînê tewr pîlî da hema hetê 50 mîlyon kesan ra yeno qiseykerdene. Dewrê peyênî de vera kultur û ziwanê kurdan hêrişê qirkerdişî zêdîyayî. Rojawanê Tirkîya de kurdê ke kurdkî qisey kenê raştê lînçî yenê, kam ke kurdkî deyîre vano û govnede geno raştê hêrişî yeno û yeno tepişten, nuşteyê hîşyarkerdişî yê ke îdareyê herêmî nuştî yenê esteritene. Meclîs de kurdkî sey 'ziwano ke nîno zanayene' yeno pênaskerdene. Îqtîdarê AKP-MHPyî keno ke bi qirkerdişê ziwan û kulturê kurdan, kurdan qir bikero. No caardiş faşîzmo kulturî yo. Kurdî bi des serran o têkoşînê ziwan û kulturî danê û rixmê polîtîkayanê qirkerdişê kulturî no têkoşîn do çirey mevindo.''