Wekîlê Partîya Çep a Keske yê Şirnexî û Endamê Komîsyonê Ekolojî yê Partîye Mehmet Zekî Îrmezî derheqê şewatê Koyê Cûdîyî û talanê xoza de ANFyî rê qisey kerd.

Îrmezî da zanayene ke her serre herêma mabênê koyanê Cûdî, Besta û Gabar de çarçewa polîtîkayanê 'asayîşê taybetî' de warî merdiman ra yenê xalîkerdene. Îrmezî vist vîrî ke cata serranê 90an de herême hetê dewlete ra ameyêne vêşnayene û xoza ameyêne talankerdene. 

Îrmezî vat: ''Dewlete Terteleyê Dêrsimî ra nata herêmanê Kurdîstanî merdiman ra xalî kena û xoza wêran kena. Cûdî de verê cû 21 dewî est bîyî la nika yew dewe est a. 2018 ra nata Cûdî de se ra 10ê daristanê Şirnexî ameyî birnayene. Hema zî birnayîşê daran dewam keno. Xîret yeno kerdene ke herême de yew gandar zî nêmano. Her 15 rojan de yew herêmê Şirnexî binê nameyê 'herêma asayîşê taybetî' yenê qedexekerdene. Heywankarî nêeşkenê şorê wareyan la fîrmayê maden û petrolî pa qoricîyan bi rehetî herême de gêrenê.''

Îrmezî ard ziwan ke seba ke verê talanê xoza bêro girewtene herême de çew pê dezgehêkê fermîyî hêvî nêkeno û vat: ''Seba ke verê şewatî bêro girewtene xetêka xoverdayîşî ya komelkî lazim a. Dişmenê kurdan dişmenê xoza yê zî. Ganî dezgehê ma û şarê ma pîya yew xeta xoverdayîşî awan bikerê, sewbîna çareyêke çin a. AKP-MHP seba ke talanê xozaya Kurdîstanî pîlêr bikerê gamanê cidîyan erzenê. Ma sey partîye neçare yê ke ney bivisnê rojdemî. Çarçewa plansazîya çalakîyanê verê ma de ganî ma xo biresnê ê cayanê ke tede darî birîyenê û yenê vêşnayene û nînan de xeta xoverdayîşî awan bikerê.''