Goreyê zanayîşanê ke merdimanê tepişteyan ra ameyî girewtene tepişteyanê sîyasîyan ê cinîyan ê Zîndanê Bayburtî ser o tedayêka girane yena kerdene.

Seba tepişteyanê ke cezaya girane û muebede înan ra ameye dayene, di serran ra nata aktîvîteyê komelkîyî ameyî qedexekerdene û têna destûr danê ke tepişteyî bivejîyê waranê akerdeyan ê odayêke.

Ame parekerdene ke êyê ke vera dîyene, yenê berdene odaya fermandarê cendirmeyan ê zîndanî ya ke tede 3 kesê sivîlî û nênasî estê. Nê 3 kesî gef wanenê û vanê ke ''Ti ya vejîyena teber bêveng bibe.''

Hetê bînî ra wextê hûmaritişî de zî tepişteyan rê heqaret yeno kerdene, tepişteyê nêweşî nênê dermankerdene yan zî bi hawayêkê kelemçekerdeyî yenê berdene nêweşxane.

Goreyê zanayîşanê merdimanê tepişteyan, tepişteya bi nameyê Mulkîye Dogan di serrî verê cû dejê ci yê didanî estbi la nêameye dermankerdene. 

Meryem Abî, Zeynepe Erdem û Neslîhane Çetîn zî yê ke meseleyê înan ê weşîye estê, nênê dermankerdene, erey yenê sewqkerdene û bi hawayêkê kelemçekerdeyî yenê berdene bi nêweşxaneyan.

Zîndan de têna qelemê kewe û sipî danê tepişteyan. Tepişteyî nêeşkenê bi kurdkî mektub binusê û eke mektub de çekuyêke zî kurdkî estba mektub nêno erşawitene.

Wextê sereştişan û cigêrayîşan de zî eşyayî yenê serûbinkerdene û dest nîyena fotografanê şexsîyan.