Pîrê elewîyan Huseyîn Esenî û Mala Şukru Aslanî derheqê tecrîdê Îmraliyî û xoverdayîşê zîndanan de ANFyî rê qisey kerd.

Pîr Huseyîn Esenî ard ziwan ke verê cûya hempare ya kurdan û tirkan de astengîya tewr pîle ferasetê îqtîdarî yo û vat: ''Îqtîdar qure yo, xo serwer vîneno û dest nano heqanê şarî ser. Eleqeyê tecrîdê vera Birêz Abdullah Ocalanî bi şerî est o. Şer yeno manaya xespkerdişê heqan, îşxalî. 

Goreyê huqûqî gan û weşîyê tepişteyan dewlete rê emanet ê. Nika zîndanan de heqê tepişteyan yenê binpaykerdene. Astengkerdişê pêvînayîşê bi keye û avûkatan yeno manaya çi? Xora o merdim mîyanê dêsan de yo. La bi nê astengkerdişî heqê ci yo tewr xozayî yeno binpaykerdene. Na meseleya tecrîdî ganî cade bêra çareserkerdene û waştişê tepişteyanê grevê vêşanîye bêrê caardene.''

Mala Şukru Aslanî vat: ''Tecrîd bi xo raşt nîyo. Şima Birêz Ocalan de pêvînayîş kerdêne, Newroze de mektuba ci daye wendene. Dima çi vurîyayo? Nika şima vanê 'Ocalan destê ma de esîr o, heta ke şima goreyê waştişê ma tênêgêrê ma do ey vera nêdê.' Goreyê qanûnan ganî Ocalan bieşko keye û avûkatanê xo bivîno. Îslam de zî cayê nê binpaykerdişî çin o. Heta nika zaf cenazayî zîndanan ra vejîyayî. 

Ganî sere de dîndarî û alîmê kurdî pêro kurdî yew bibê û paştî bidê grevê vêşanîye yê tepişteyan. Îslam de yew esaso winayên est o ke ganî merdim vera zulmî vejîyo; no heq o. Coka ma xoverdayîşê tepişteyan ê vera zulmê tecrîdî sey heqî vînenê.''